Səfər Mehdiyev Erkan Özoralla görüşdü


Aprelin 15-də Dövlət Gömrük Komitəsinin (DGK) sədri, gömrük xidməti general-polkovniki Səfər Mehdiyev diplomatik fəaliyyətinin başa çatması ilə əlaqədar Türkiyə Respublikasının ölkəmizdəki səfiri Erkan Özoralla görüşüb.


DGK-dan verilən məlumata görə, Komitənin sədri Azərbaycan Respublikasının Prezidenti İlham Əliyev tərəfindən Azərbaycan və Türkiyə arasında dostluq və əməkdaşlıq əlaqələrinin inkişafındakı xüsusi xidmətlərinə görə “Dostluq” ordeni ilə təltif edilməsi münasibətilə səfir Erkan Özoralı təbrik edib, gələcək fəaliyyətində uğurlar arzulayıb.

Səfər Mehdiyev Azərbaycanla Türkiyə arasında tarixi ənənələrə söykənən strateji tərəfdaşlıq münasibətlərindən məmnunluqla bəhs edərək bildirib ki, iki ölkənin dövlət başçılarının apardığı məqsədyönlü siyasət bütün sahələrdə əlaqələrin güclənməsində mühüm rol oynayıb.

Komitə sədri iki ölkə arasında bütün sahələrdə, o cümlədən gömrük işinin təşkili istiqamətində əməkdaşlığın genişləndirilməsində səfir Erkan Özoralın fəaliyyətini yüksək qiymətləndirib və ona təşəkkürünü bildirib.

Səfir Erkan Özoral Azərbaycan-Türkiyə əməkdaşlığının sadəcə iki ölkənin xalqlarının deyil, eyni zamanda, region ölkələrinin rifahının yüksəldilməsində, sülhün bərpasında mühüm rol oynadığını və digər dövlətlərə nümunə olduğunu diqqətə çatdırıb, gələcəkdə də ikitərəfli əlaqələrin gücləndirilməsi üçün səylərini əsirgəməyəcəyini bildirib.



AFN.az
Redaksiyamızla əlaqə: tel; 070 372 99 90, e-mail:office@afn.az




menyu
menyu