Dünyada 50 yaşdan aşağı insanlarda bağırsaq xərçəngi artmaqdadır
Dünyada 50 yaşdan kiçik insanlarda bağırsaq xərçəngi diaqnozu artır.
"Lancet Oncology"də dərc olunan araşdırmaya görə, bağırsaq xərçəngi nisbətlərinin ən sürətlə artdığı ölkələr arasında Yeni Zelandiya və Çili var.
Tədqiqat Avropa və Şimali Amerikadan Asiya və Okeaniyaya qədər bir çox bölgədə gənc yetkinlərdə erkən başlanğıc bağırsaq xərçənginin artdığını ortaya qoyur.
Bu artım araşdırılan 50 ölkədən 27-də müşahidə edilərkən, ən yüksək illik artım nisbətləri Yeni Zelandiya (4 faiz), Çili (4 faiz), Puerto Riko (3,8 faiz) və İngiltərədə (3,6 faiz) müşahidə olunub.
Mütəxəssislər bu artımın səbəblərinin hələ də tam aydınlaşdırılmadığını, lakin qeyri-sağlam qidalanma, fiziki hərəkətsizlik və piylənmə kimi faktorların mühüm rol oynaya biləcəyini bildirirlər.
Tədqiqat gənc yetkinlərdə bağırsaq xərçənginin artmasının gələcək illərdə yaşlı əhalidə artım nisbətlərinə səbəb ola biləcəyini və xəstəliyə qarşı onilliklər ərzində əldə edilən irəliləyişi geri çevirə biləcəyini xəbərdar edir.
Tədqiqatçılar xərçənglə mübarizə üçün yeni üsulların inkişaf etdirilməli, pəhriz vərdişləri, fiziki hərəkətsizlik və artıq çəki ilə əlaqəli xərçənglərin qarşısını almaq və nəzarət etmək üçün innovativ vasitələrə ehtiyac olduğunu vurğulayırlar.
Həmçinin qeyd edilir ki, gənc fərdlər xəstəliyin əlamətlərinə daha çox bələd olmalıdırlar. Bu simptomlara rektal qanaxma, qarın ağrısı, bağırsaq vərdişlərində dəyişiklik və səbəbsiz kilo itkisi daxildir.
Xərçəng Araşdırmaları Böyük Britaniya CEO-su Mişel Mitşel gənc yetkinlərdə bağırsaq xərçəngi nisbətlərinin hələ də aşağı olduğunu, lakin artan tendensiyanın səbəblərini başa düşmək lazım olduğunu söyləyib. Bildirilib ki, tədqiqat məlumatları yalnız 2017-ci ilə qədər olan dövrü əhatə edir və bütün əhalini təmsil etmədiyi üçün ehtiyatla şərh edilməlidir.
Tədqiqatçılar vurğulayırlar ki, gənc fərdlərin məlumatlılığını artırmaqla diaqnozun qoyulmasında gecikmələrin qarşısını almaq və xəstəlikdən ölüm hallarını azaltmaq mümkün ola bilər.
Mənbə: The Guardian
