NATO-Ukrayna Şurası Qara dəniz taxıl müqaviləsi ilə bağlı iclas keçirib
NATO-Ukrayna Şurası Rusiyanın Türkiyə və Birləşmiş Millətlər Təşkilatının (BMT) müzakirə etdiyi Qara dəniz taxıl sazişindən çıxmasından sonra bölgədəki ciddi təhlükəsizlik vəziyyətini həll etmək üçün toplaşıb.
NATO-Ukrayna Şurası iyulun 11-12-də NATO-nun Brüsseldəki mənzil-qərargahında səfirlər səviyyəsində Vilnüs Sammitində təsis edildikdən sonra ikinci iclasını keçirib. İclasda Ukrayna baş nazirinin müavini Aleksandr Kubrakov və Ukrayna hərbi rəsmiləri də iştirak edib.
Görüş NATO-nun baş katibi Yens Stoltenberq və Ukrayna prezidenti Vladimir Zelenski arasında keçən həftə məsləhətləşmələrdən sonra keçirilib. İclasa NATO baş katibinin müavini Mirça Coana sədrlik edib.
NATO iclasdan sonra verdiyi açıqlamada Rusiyanın müqavilədən çıxma qərarı və Ukraynanın taxıl ixracını dayandırmaq cəhdlərinin, Ukraynadakı liman şəhərlərinə və taxıl anbarlarına hücumlarının müttəfiqlər və Ukrayna tərəfindən pisləndiyini bildirib.
Bolqarıstanın Qara dənizdəki müstəsna iqtisadi zonasında Rusiyanın yeni xəbərdarlıq zonasının səhv hesablamalar və gərginliyin artması riski yaratdığını ifadə edən Yens Stoltenberq bildirib: "Rusiya Qara dənizdə təhlükəli və gərginləşən hərəkətlərə görə tam məsuliyyət daşıyır. Rusiya aclıqdan silah kimi istifadə etməyi dayandırmalı və dünyanın ən həssas əhalisini ərzaq qeyri-sabitliyi ilə hədələməməlidir. Rusiyanın hərəkətləri həm də strateji əhəmiyyətli Qara dəniz regionunda NATO üçün sabitliyə ciddi təhlükə yaradır". Müttəfiqlər Ukraynaya dəstəyimizi və sayıqlığımızı artırırlar. Biz Alyansın hər qarış ərazisini istənilən hücumdan müdafiə etməyə hazırıq".
İclasdan sonra verilən bəyanatda qeyd edilir ki, müttəfiqlər Türkiyənin taxıl sazişini canlandırmaq üzrə davamlı səylərini, həmçinin Bolqarıstan və Rumıniya da daxil olmaqla digər müttəfiqlərin, Aİ və BMT-nin Ukrayna taxılını quru və dəniz yolu ilə ixrac etmək səylərini alqışlayırlar.
NATO və müttəfiqlərinin dəniz patrul təyyarələri və pilotsuz uçuş aparatları ilə Qara dənizdə kəşfiyyat və müşahidə fəaliyyətlərini artırdığına diqqət çəkilərək, Rusiyanın Ukraynaya hücumundan sonra NATO-nun bölgədəki varlığını artırdığı xatırladılıb.
