Glioblastoma ilə mübarizədə yeni üsul: Beyin şişinin inkişafı yavaşladılıb
ABŞ-ın Virciniya Universitetinin tədqiqatçıları müalicəsi ən çətin beyin xərçəngi növlərindən biri olan glioblastomaya qarşı eksperimental üsul hazırlayıblar.
AFN.az xəbər verir ki, səs dalğaları və nanotexnologiyanın birlikdə tətbiq edildiyi bu üsulda qan-beyin baryeri müvəqqəti olaraq keçilir, eyni zamanda şişin böyüməsini və yayılmasını dəstəkləyən genlər hədəfə alınır. Bununla da beyində şişin yayılmasını yavaşlatmaq mümkün olur. Lakin təcrübə hələ insanlar üzərində aparılmayıb.
Glioblastoma sürətlə inkişaf etməsi və ətrafındakı sağlam beyin toxumasına yayıla bilməsi səbəbindən müalicəsi olduqca çətin olan xərçəng növləri arasında yer alır. Xəstəliyin müalicəsində əsas maneələrdən biri beyni zərərli maddələrdən qoruyan, lakin bir çox dərmanın beyin toxumasına çatmasını da çətinləşdirən qan-beyin baryeridir.
NTV-nin məlumatına görə, Virciniya Universitetinin Tibb fakültəsinin onkologiya üzrə mütəxəssisi doktor Rocer Abunader və komandası bu maneəni aradan qaldırmaq üçün fokuslanmış səs dalğalarından istifadə ediblər. Eksperimental üsulda səs dalğalarının köməyi ilə qan-beyin baryeri müvəqqəti olaraq açılıb.
Daha sonra nanotexnoloji daşıyıcılar vasitəsilə şiş nahiyəsinə mikroRNT molekulları çatdırılıb. Bu molekulların xərçəng hüceyrələrinin böyüməsini və yayılmasını dəstəkləyən genləri zəiflətməsi müəyyən edilib.
Tədqiqatçılar səs dalğaları, nanotexnologiya və mikroRNT-nin birlikdə tətbiqi sayəsində eyni vaxtda bir neçə mühüm genin hədəfə alına bildiyini bildiriblər. Heyvan modelləri üzərində aparılan təcrübələrdə bu üsulun şişin inkişafını nəzərəçarpacaq dərəcədə yavaşlatdığı müşahidə olunub.
Tədqiqatın diqqətçəkən xüsusiyyətlərindən biri müalicəvi molekulların birbaşa şiş nahiyəsinə çatdırılmasını hədəfləməsidir. Bununla da xərçəngin böyüməsini dəstəkləyən genlərin hüceyrə səviyyəsində zəiflədilməsi nəzərdə tutulur.
Heyvanlar üzərində aparılan təcrübələrdə əldə edilən müsbət nəticələrdən sonra tədqiqat qrupu üsulun insanlar üzərində təsirini araşdırmaq üçün klinik sınaqlara hazırlaşır.
Lakin hazırlanmış üsul hələ insanlar üzərində sübut edilmiş və ya istifadəyə verilmiş müalicə vasitəsi deyil. Onun təhlükəsizliyinin və effektivliyinin müəyyən edilməsi üçün klinik tədqiqatların tamamlanması tələb olunur.
Alimlər yeni yanaşmanın gələcəkdə glioblastomanın müalicəsində fərqli seçimlərin hazırlanmasına töhfə verə biləcəyini düşünürlər.
