Trampın media şirkəti yenidən milyonlarla dollarlıq zərəri açıqladı
ABŞ Prezidenti Donald Trampa məxsus Trump Media and Technology Group ilin ilk rübündə 405 milyon dollardan çox xalis zərər etdiyini açıqlayıb.
AFN.az xəbər verir ki, şirkətin gəlirlərinin aşağı səviyyədə qalması və səhmlərinin dəyərindəki kəskin eniş diqqət çəkib.
Donald Trampa məxsus Trump Media and Technology Group 2026-cı ilin ilk rübündə 405 milyon dollardan çox xalis zərər açıqlayıb. Şirkətin maliyyə nəticələrinə görə, eyni dövrdə əldə olunan xalis satış gəliri 871 min dollar səviyyəsində qalıb.
Şirkət rəhbərliyi böyük itkinin əsas səbəbləri arasında rəqəmsal aktivlərin dəyərdən düşməsi, faiz xərcləri və səhm əsaslı ödənişləri göstərib. Açıqlamada bildirilib ki, təxminən 368,7 milyon dollarlıq zərər rəqəmsal aktivlərdən qaynaqlanıb. Bundan əlavə, faiz xərclərinin 11,5 milyon dollar, səhm əsaslı mükafatlandırmanın isə 11,8 milyon dollar olduğu qeyd edilib.
Şirkət buna baxmayaraq ümumi aktivlərinin 2,2 milyard dollar səviyyəsində olduğunu və ardıcıl dördüncü rübdə müsbət əməliyyat pul axını əldə etdiyini açıqlayıb. Tramp Media səhmləri cümə günü 9 dolların altında ticarət olunub. Şirkət səhmləri ilin əvvəlindən bəri dəyər itirir və 2022-ci ildə qeydə alınan pik səviyyədən təxminən 10 dəfə aşağı düşüb.
Şirkətin son illərdə zərərlərinin sürətlə artdığı müşahidə olunur. Xalis zərər 2023-cü ildə 58,2 milyon dollar olduğu halda, 2024-cü ildə 400 milyon dolları keçib. 2025-ci il üzrə itkilərin isə 712 milyon dollardan çox olduğu bildirilib.
Şirkət ötən ay rəhbərlikdə mühüm dəyişiklik edib. Uzun müddət baş icraçı direktor vəzifəsini icra edən keçmiş Respublikaçı Konqres üzvü Devin Nunes vəzifəsindən uzaqlaşdırılıb. Trampa məxsus media şirkəti son dövrlərdə investor marağını artırmaq üçün müxtəlif sektorlara yönəlməyə çalışır.
Şirkət dekabr ayında TAE Technologies ilə 6 milyard dollardan çox dəyərə malik səhm əsaslı birləşmə razılaşması imzaladığını açıqlamışdı. Razılaşmanın 2026-cı ilin ortalarında tamamlanması gözlənilir. Trump Media həmçinin Truth Social sosial şəbəkəsi üzərindən proqnoz bazarları xidməti təqdim etməyi planlaşdırır.
