Ceyhun Bayramov: Azərbaycan türk həmrəyliyini gücləndirməyə sadiqdir
Ankarada keçirilən Türk Dövlətləri Təşkilatının Xarici İşlər Nazirləri Şurasının iclasında iştirak etməkdən və çıxış etməkdən məmnunam.
AFN.az xəbər verir ki, bunu Azərbaycanın xarici işlər naziri Ceyhun Bayramov X hesabında yazıb.
Nazir bildirib ki, 2025-ci ildə keçirilən Qəbələ Zirvə Toplantısından bəri Azərbaycanın türk həmrəyliyini dərinləşdirmək, əməkdaşlığı gücləndirmək, eləcə də iqtisadi və nəqliyyat əlaqələrini genişləndirmək istiqamətindəki sədrliyi dövründə həyata keçirdiyi səylər vurğulanıb.
Bayramov qeyd edib ki, TDT Təhlükəsizlik Şurası katiblərinin Bakı görüşündən və müdafiə sənayesi sahəsində əməkdaşlıq üzrə 2027-ci il yol xəritəsindən tutmuş, ortaq mədəni irsi qoruyan təşəbbüslərə qədər bir çox sahədə əməkdaşlıq inkişaf etdirilib.
Onun sözlərinə görə, 2026-cı ildə keçirilən dörd görüş regional və qlobal problemlər üzrə siyasi dialoqu və koordinasiyanı gücləndirib.
Azərbaycan ortaq vizyonu konkret nəticələrə çevirməyə, TDT-nin imkanlarından tam istifadə etməyə, sülh və rifah naminə, eləcə də beynəlxalq səviyyədə daha güclü kollektiv səs formalaşdırmaq üçün tərəfdaşlığı gücləndirməyə sadiq qalır.
