Putin İlon Maskı əsl dahi adlandırıb
Rusiya prezidenti Vladimir Putin “SpaceX” şirkətinin qurucusu İlon Maskla peyk texnologiyaları sahəsində sıx əlaqə saxladıqlarını bildirərək onu əsl dahi adlandırıb.
AFN.az xəbər verir ki, Putin Moskvada keçirilən Rusiya-Afrika sammitində çıxışı zamanı Maskla əlaqə saxlamağın əhəmiyyətini vurğulayıb.
Putin Rusiyanın öz peyk internet layihəsi olan Rassvet ilə “Starlink” peyklərinin orbitdə bir-birinin fəaliyyət sahəsinə müdaxilə etməməsini təmin etmək üçün Maskla ünsiyyətin vacib olduğunu bildirib.
O, amerikalı tərəfdaşlarla siyasi problemlərə baxmayaraq, sıx əməkdaşlıq apardıqlarını qeyd edib.
Şirkət məlumatlarına görə, “Starlink” təxminən 13 min peyk orbitə çıxarıb. Onlayn peyk izləmə sistemləri isə Rassvet layihəsinin orbitdə xeyli az sayda peykə malik olduğunu göstərir.
Rusiyanın Cənubi Afrikadakı səfirliyi Rassvet layihəsinin ölkə üçün ilk addımlar olduğunu və Rusiyanın kosmik sahədə ABŞ-la sıx əlaqə saxladığını bildirib.
Bu hadisələr ABŞ və Rusiya arasında son dövrdə müşahidə olunan diplomatik fəallıqla eyni vaxta təsadüf edib.
ABŞ prezidenti Donald Tramp bu ay verdiyi açıqlamada Rusiya ilə yanacağın qiymətlərini azaltmaq məqsədilə dizel idxalı məsələsində razılığa gəldiklərini bildirmişdi. Bundan sonra Rusiyaya qarşı bəzi sanksiyalardan imtina edilmişdi.
Digər tərəfdən, Ukrayna ordusu Rusiyaya qarşı əməliyyatlarında “Starlink” internetindən asılı vəziyyətdədir. Ötən həftə baş verən bağlantı problemlərinin “SpaceX” tərəfindən qəsdən yaradıldığı bildirilib.
