Cənubi Koreya Google və Apple-ı 47,5 milyon dollar cərimələyib
Cənubi Koreyada Google və Apple tətbiq mağazaları bazarındakı mövqelərindən sui-istifadə etdikləri iddiası ilə ümumilikdə 47,5 milyon dollar məbləğində cərimələniblər.
AFN.az xəbər verir ki, Cənubi Koreyanın media və telekommunikasiya sahələrini tənzimləyən Koreya Media və Kommunikasiya Komissiyasının ABŞ mərkəzli iki şirkətlə bağlı araşdırması başa çatıb. Araşdırma 2021-ci ildə qəbul edilən və tətbiq tərtibatçılarının müəyyən ödəniş sistemlərindən istifadə etməyə məcbur edilməsini qadağan edən qanunun pozulması iddiası ilə aparılıb.
Komissiya Google və Apple-ın tətbiq tərtibatçılarını öz tətbiqdaxili ödəniş sistemlərindən istifadə etməyə məcbur etdiyini, xarici internet saytları vasitəsilə həyata keçirilən ödənişlərə isə mane olduğunu bildirib.
Komissiyanın məlumatına görə, şirkətlər texniki baxımdan tətbiqlərdə üçüncü tərəflərin ödəniş sistemlərinə icazə versələr də, tərtibatçılardan 26 faiz komissiya alıb və öz sistemlərində təqdim olunan bəzi funksiyaları məhdudlaşdırıblar. Bununla da tərtibatçılar faktiki olaraq şirkətlərin öz tətbiqdaxili ödəniş sistemlərindən istifadə etməyə məcbur ediliblər.
Komissiya həmçinin tətbiqlərin yoxlanılması proseslərinin gecikdirildiyi, tərtibatçılara gecikmələrin səbəbləri və yoxlamaların nə vaxt davam etdiriləcəyi barədə aydın məlumat verilmədiyi halları müəyyən etdiyini açıqlayıb.
Nəticədə komissiya Google-a 32 milyon dollar, Apple-a isə 15,5 milyon dollar cərimə tətbiq edib. Hər iki şirkətə Cənubi Koreyalı tərtibatçıların tətbiqlərində xarici ödəniş keçidlərindən istifadəyə icazə vermək və tətbiqlərin yoxlanılması prosedurlarını təkmilləşdirmək barədə də göstəriş verilib.
