Kim Çen In KXDR ordusunun döyüş hazırlığının artırılmasını tələb edib
Şimali Koreya lideri Kim Çen In ölkə ordusunun bölmələrinin fasiləsiz və intensiv təlimlər vasitəsilə müharibəyə tam hazır vəziyyətə gətirilməsini tələb edib.
AFN.az xəbər verir ki, bu barədə Koreya Mərkəzi Teleqraf Agentliyi (KCNA) KXDR Xalq Ordusunun rota komandirlərinin III müşavirəsində Kim Çen Inın çıxışına istinadən məlumat yayıb.
“Rota komandirlərinin qarşısında duran ilkin inqilabi vəzifə bölmələrin müharibəyə tam hazır olmasını təmin etmək üçün döyüş hazırlığını başa çatdırmaqdır. Bu vəzifənin yerinə yetirilməsi yolu isə fasiləsiz və intensiv təlimlərdir”, – deyə Şimali Koreya lideri bildirib.
Kim Çen In vurğulayıb ki, rota komandirləri yüksək döyüş qabiliyyətinə, inqilabi əqidəyə və vətənpərvərlik ruhuna malik bölmələr formalaşdırmalıdırlar. Onun sözlərinə görə, bu istiqamətdə əldə edilən nəticələr komandirlərin peşəkarlığını və təşkilatçılıq bacarıqlarını göstərəcək.
KXDR lideri qeyd edib ki, Xalq Ordusunun gücü yalnız müasir silahlarla deyil, həm də hərbçilərin siyasi-ideoloji möhkəmliyi və ayrı-ayrı bölmələrin döyüş imkanları ilə müəyyən olunur. O, silahlı qüvvələrdə dəyişiklikləri davam etdirmək niyyətində olduğunu və bu prosesdə əsas diqqətin rota komandirlərinə yönəldiləcəyini bildirib.
KCNA-nın məlumatına görə, müşavirə oktyabrın 27-də keçirilib.
