Google 425 milyon dollar cərimələndi
ABŞ-da federal məhkəmə Google-un istifadəçilərin məxfilik hüquqlarını pozduğuna qərar verib.
Şirkət istifadəçilərin hesablarında izləmə funksiyasını söndürməsinə baxmayaraq milyonlarla şəxsdən məlumat toplamağa davam etdiyi üçün 425 milyon dollar təzminat ödəməyə məhkum edilib.
Toplu iddia çərçivəsində təxminən 98 milyon Google istifadəçisi və 174 milyon cihaz iştirak edib. 2020-ci ildə açılan iddiada istifadəçilər Google-un mobil cihazlardan icazəsiz məlumat topladığını, saxladığını və istifadə etdiyini iddia ediblər. İddiaçılar 31 milyard dollardan çox təzminat tələb etmişdilər.
Məhkəmə jürisi Google-u üç gizlilik pozuntusu iddiasından ikisində məsuliyyətə cəlb edib, lakin şirkətin pis niyyətlə hərəkət etmədiyinə qərar verib.
Google qərarın yanlış olduğunu bildirərək apellyasiyaya müraciət edəcəyini açıqlayıb. Şirkət sözçüsü BBC-yə verdiyi açıqlamada deyib ki, məhsullarımızın necə işlədiyi düzgün başa düşülməyib. Gizlilik alətləri insanlara məlumatları üzərində nəzarət təmin edir: "Fərdiləşdirməni söndürdüklərində bu seçimi nəzərə alırıq".
Google həmçinin qeyd edib ki, “Veb və Tətbiq Fəaliyyəti” söndürülsə belə, müəssisələr Google Analytics vasitəsilə sayt və tətbiq istifadəsi haqqında məlumat toplaya bilər, lakin bu məlumatlar şəxsi istifadəçiləri tanımır və gizlilik seçimlərini pozmur.
Bununla belə Google-un ana şirkəti Alphabet-in səhmləri həftə ərzində 9%-dən çox qiymət artımı göstərib. Bunun səbəbi ayrı bir məhkəmədə federal hakimin şirkətin Chrome brauzerini satmağa məcbur edilməyəcəyinə qərar verməsi olub.
Lakin məhkəmə qərar verib ki, Google yalnız öz məhsullarında deyil, Apple kimi üçüncü tərəf cihazlarda axtarış motoru mövqeyini qorumaq üçün xüsusi razılaşmalar edə bilməz. Şirkət həmçinin axtarış məlumatlarının bir hissəsini rəqibləri ilə paylaşmalı olacaq.
ABŞ Ədliyyə Nazirliyinin açdığı iddia Google-un onlayn axtarış bazarında üstünlüyünə qarşı uzun illərdir davam edən hüquqi mübarizənin bir hissəsi hesab olunur.
