Yaponiya və ABŞ birgə raket istehsalı üçün müəssisə quracaq
Yaponiyanın müdafiə naziri Koizumi Şinciro ABŞ ilə qabaqcıl orta mənzilli hava-hava raketlərinin birgə istehsalı məqsədilə ölkəsində müəssisə yaradılması barədə razılıq əldə etdiklərini açıqlayıb.
AFN.az xəbər verir ki, Cənub-Şərqi Asiya Ölkələri Assosiasiyasının Müdafiə Nazirlərinin Görüşü Plus (ADMM-Plus) çərçivəsində Filippində olan Koizumi keçirdiyi mətbuat konfransında ABŞ-ın müdafiə naziri Pit Heqsetlə görüşünə dair açıqlamalar verib.
Koizumi ABŞ ilə qabaqcıl orta mənzilli hava-hava raketlərinin birgə istehsalı üçün Yaponiyada müəssisə qurulması barədə razılığa gəldiklərini bildirib.
Operation Supercharge adlanan birgə təşəbbüs çərçivəsində istehsal ediləcək raketlərin F-35 qırıcıları üçün həyati əhəmiyyət daşıdığına diqqət çəkən Koizumi Yaponiya-ABŞ ittifaqının çəkindirmə və müdaxilə imkanlarının əvvəlkindən daha sürətli və intensiv şəkildə gücləndirilməsi barədə razılığa gəldiklərini deyib.
Koizumi Heqsetlə görüşdə güc tətbiqi, təzyiq və ya digər vasitələrlə mövcud vəziyyəti birtərəfli qaydada dəyişdirmək cəhdlərini rədd edən, hüququn aliliyinə əsaslanan azad və açıq beynəlxalq nizamın əhəmiyyətini bir daha təsdiqlədiklərini vurğulayıb.
