Süni intellekt investisiyaları Alphabet-in bazar dəyərini 500 milyard dollardan çox azaldıb
Google-un ana şirkəti Alphabet cümə axşamı kommersiya əməliyyatları ilə bağlı ilin son yeniləməsini açıqladıqdan və bu məlumatlar “Uoll Strit”də narahatlıq yaratdıqdan sonra bazar dəyərinin 500 milyard dollardan bir qədər çoxunu itirib.
AFN.az xəbər verir ki, Google axtarış nəticələrində süni intellekt (AI) xülasələrinin reklam gəlirlərinə təsir etdiyini açıqladıqdan sonra investorlar ciddi narahatlıq keçirib və şirkətin səhmləri son altı ayın ən aşağı səviyyəsinə enib.
“Microsoft” və “Amazon” da bu həftə investorları məlumatlandıraraq davam edən süni intellekt yarışında astronomik məbləğdə vəsait xərcləməyi planlaşdırdıqlarını açıqlayıblar.
Lakin investorlar bu planların şirkətlərin əsas biznes istiqamətlərini inkişaf etdirməyə davam etmək imkanlarına təsirindən narahat görünürdülər.
İlk baxışdan Google-un ana şirkəti Alphabet-in rüblük nəticələri heç də pis deyildi.
Ümumi gəlir ötən illə müqayisədə 25 faiz artaraq 127,6 milyard dollara çatıb. Gəlirin 103 faiz artaraq təxminən 31 milyard dollara yüksəldiyi Google Cloud xidmətinin davamlı uğuru da buna töhfə verib.
Lakin şirkətin mənfəəti rüb ərzində əhəmiyyətli dərəcədə — 25 faiz azalıb. Şirkətin tarixində ikinci dəfə sərbəst pul axını mənfi olub və bu dəfə göstərici 9 milyard dolları ötüb. Bu, Alphabet-in cəmi üç ay əvvəl qeydə aldığı pul itkisi ilə müqayisədə təxminən iki dəfə çoxdur.
Pul axını şirkətin əməliyyat və investisiya xərclərini ödədikdən sonra əlində qalan vəsaiti ifadə edir. Bu isə Alphabet-in artıq qazandığından daha çox pul xərclədiyini göstərir. Yeni xərc səviyyəsi demək olar ki, tamamilə Google-un süni intellekt investisiyalarına yönəlib.
Cümə axşamı ticarət gününün sonunda şirkətin ümumi bazar dəyəri əvvəlki gün qeydə alınan 3,97 trilyon dollardan 3,46 trilyon dollara düşüb.
Google-un geniş istifadə olunan axtarış sistemi artıq istifadəçilərin sorğularına süni intellekt xülasələrini standart olaraq təqdim edir. Bu isə rüb ərzində şirkətin sata bildiyi reklamların sayına təsir göstərib.
Google axtarış nəticələri ilə birlikdə göstərilən reklamların satışı Alphabet-in biznesinin böyük hissəsini təşkil edir.
Forrester şirkətinin baş analitiki Treysi Vu bildirib ki, Alphabet-in axtarış biznesi üzrə məyusedici nəticələri mövcud bizneslərin gücünü qorumaqla yanaşı, böyük süni intellekt investisiyalarını maliyyələşdirməyin çətinliyini üzə çıxarır.
Google-un baş kommersiya direktoru Filip Şindler çərşənbə günü axtarış sisteminin süni intellektə əsaslanan versiyasının inkişafından çox razı olduğunu desə də, şirkətin səhmləri cümə axşamı təxminən 13 faiz ucuzlaşaraq bu il üzrə ikinci ən zəif göstəricisini nümayiş etdirib.
“Amazon”un səhmləri də investorları məyus edən nəticələrin açıqlanmasından sonra cümə axşamı dəyər itirib. Şirkətin səhmləri birjadan sonrakı ticarət əməliyyatlarında 6 faiz ucuzlaşıb.
Rüblük satışların 11 faiz artaraq 201 milyard dollara çatmasına baxmayaraq, şirkət mənfi 42 milyard dollarlıq pul axını göstəricisi açıqlayıb.
Bu rəqəm “Amazon”un təkcə qazandığından daha çox pul xərcləmədiyini, həm də bu xərclərin üç aylıq müddət ərzində altı dəfə artdığını göstərir.
İcraçı direktor Endi Cessi şirkətin gələcəkdə “Amazon”a 1 trilyon dollar qazandıra biləcək bir deyil, iki biznes imkanı olduğu üçün bu qədər vəsait xərclədiyini iddia edib.
Cessi “Amazon”un hansı iki biznes istiqamətini nəzərdə tutduğunu açıqlamayıb. Lakin maliyyə analitikləri ilə görüşündə şirkətin öz kompüter çiplərini istehsal edib satmasının, eləcə də ödənişli istifadəçilərə əksər böyük süni intellekt modellərinə və alətlərinə çıxış imkanı verən Bedrock süni intellekt platformasının maliyyə potensialından dəfələrlə bəhs edib.
Cessidən şirkətin xərclərini izah etməsi bir neçə dəfə istənildikdən sonra o, bu investisiyaların qarşıdakı 25 ilə yayılmasının daha məqsədəuyğun olacağını etiraf edib, lakin yaşadıqları dünyanın belə olmadığını əlavə edib. O, bu planı maliyyələşdirə biləcəklərini və bunun “Amazon”un miqyasını, gəlirlərini və sərbəst pul axınını həmişəlik dəyişəcəyini düşündüyünü bildirib.
“Uoll Strit” “Microsoft”un yeniləməsinə daha mülayim reaksiya verib və şirkətin səhmləri cümə axşamı 1 faizdən az ucuzlaşıb.
“OpenAI”ın ən böyük investorlarından biri olan şirkət süni intellektə yönəlmiş investisiyalara təxminən 5 milyard dollar daha az vəsait xərcləyib. Bundan əlavə, həftənin əvvəlində şirkətin xərclərini daha da azaltmaq məqsədilə minlərlə işçini ixtisar etməyi planlaşdırdığı açıqlanıb.
Bu arada şirkətin gəliri ötən illə müqayisədə 19 faiz artaraq rüb ərzində 92,3 milyard dollara çatıb. Əhəmiyyətli bulud biznesi isə 30 faiz böyüyərək 63 milyard dollara yüksəlib.
İcraçı direktor Satya Nadella bildirib ki, “Microsoft”un süni intellekt əsaslı çatbotu və köməkçi aləti Copilot vasitəsilə yerinə yetirilən avtomatlaşdırılmış tapşırıqların sayı iyul ayından bəri demək olar ki, iki dəfə artıb, gündəlik istifadəçilərin sayı isə bir il əvvəllə müqayisədə 500 faiz yüksəlib.
Adətən xərclərin azalması və satışların artması investorların müsbət reaksiyasına səbəb olur.
Lakin Vu bildirib ki, “Uoll Strit” süni intellekt ətrafında səsləndirilən böyük vədləri həqiqətən reallaşdıracaq bizneslərin müəyyənləşdirilməsi üçün gələcəyə daha diqqətlə baxmağa çalışır.
Onun sözlərinə görə, “Microsoft”un nəticələri müəssisələrin süni intellektə tələbatının güclü olaraq qaldığını təsdiqləsə də, texnologiya sənayesinin qarşısında duran daha böyük bir sualı da gündəmə gətirir: süni intellektin yaratdığı dəyər nəticədə harada formalaşacaq?
