Finlandiya Google-un məlumat mərkəzi üçün meşələrin qırılması ilə bağlı cinayət işi açıb
Finlandiya polisi ölkənin şimalındakı kənd ərazisində tikilməsi planlaşdırılan Google məlumat mərkəzinin sahəsində ətraf mühit qanunlarının mümkün pozulması ilə bağlı cinayət araşdırmasına başlayıb.
AFN.az xəbər verir ki, səlahiyyətli qurumlar Google-un törəmə şirkəti olan “Tuike Finland”ın Muhos şəhərində planlaşdırılan ərazidə Finlandiya qanunvericiliyinin tələb etdiyi ətraf mühitə təsirin qiymətləndirilməsi başa çatdırılmadan 330 hektar meşəni qırdığını və qurudduğunu iddia edirlər.
Digər Skandinaviya ölkələri kimi Finlandiya da nisbətən sabit geosiyasi vəziyyəti, geniş torpaq sahələri və sərin iqlimi sayəsində enerji xərclərini azaltmaq imkanına görə məlumat mərkəzləri tikmək istəyən texnologiya şirkətləri üçün cəlbedici məkan hesab olunur.
Finlandiya polisi cümə axşamı yaydığı açıqlamada ilkin məlumatlara əsasən, “Tuike Finland Oy” şirkətinin məlumat mərkəzi layihəsinin tikinti sahəsində drenaj və su idarəçiliyi ilə bağlı qeyri-müəyyənliklər və çatışmazlıqlar olduğunu bildirib.
Açıqlamada cinayət araşdırması çərçivəsində digər məsələlərlə yanaşı, bu problemlərlə bağlı şəraitin də araşdırılacağı qeyd edilib.
Finlandiya rəsmiləri ABŞ şirkətinin Avropadakı ən böyük investisiyası adlandırdığı Google-un 13 milyard avroluq süni intellekt infrastrukturu layihəsi də daxil olmaqla, planlaşdırmanın müxtəlif mərhələlərində olan ümumilikdə 145 yeni məlumat mərkəzi müraciətini nəzərdən keçirirlər.
Bu ayın əvvəlində Finlandiya rəsmiləri şirkətin ərazini təmizləməzdən əvvəl ətraf mühitə təsirin qiymətləndirilməsini tamamlamaması səbəbindən Google-a Muhos və təxminən 100 kilometr cənub-şərqdə yerləşən Otanmäki şəhərlərindəki iki sahədə işləri dayandırmağı tapşırıblar.
Ekoloji icazələrə və qiymətləndirmələrə nəzarət edən Nəzarət Agentliyi Google-a ətraf mühiti dəyişdirən hazırlıq tədbirlərini dayandırmağı bildirib. İctimai fəallar Muhosda 250 min, Otanmäkidə isə 150 min ağacın kəsildiyini təxmin edirlər.
Google-un Finlandiya üzrə ölkə rəhbəri Antti Yarvinen meşələrin qırılmasına görə üzr istəyib, lakin şirkətin həmin dövrdə qanunvericiliklə bağlı malik olduğu ən yaxşı anlayışa əsasən hərəkət etdiyini müdafiə edib.
Finlandiya hökuməti layihələri təşviq edib. Sentyabr ayında Google-un planları açıqlanarkən Baş nazir Petteri Orpo investisiyaların cəlb edilməsinin ən mühüm prioritet olduğunu və razılaşmanın uzunmüddətli faydalar təmin edəcəyini bildirib.
Lakin Google-un ehtimal olunan qanun pozuntuları ilə bağlı məlumatların üzə çıxması məlumat mərkəzləri ilə bağlı razılaşmaların yerli icmalar, ətraf mühit və enerji qiymətləri üçün nə demək olduğu barədə ölkə miqyasında müzakirələrə səbəb olub. Problemin aprel ayında keçiriləcək parlament seçkilərinə təsir göstərə biləcəyi bildirilir.
93 mindən çox insan daha sərt məlumat mərkəzi tənzimləmələrinin tətbiqini və ətraf mühitə vurulan zərərin kompensasiya edilməsini tələb edən petisiyanı imzalayıb. Mütəxəssislər məlumat mərkəzlərinin məhdud sayda yerli iş yeri yaratdığını və ölkə səviyyəsində faydalarının çox az olduğunu bildirirlər.
Helsinki Universitetinin kompüter elmləri professoru Yussi Kanqaşarju Finlandiya üçün əslində heç bir faydanın olmadığını deyib.
Kanqaşarju bunların beynəlxalq müştərilərə xidmət göstərən beynəlxalq şirkətlər olduğunu və məlumat mərkəzlərinin nəticə etibarilə operator şirkətdən başqa tərəflər üçün çox az fayda verdiyini vurğulayıb.
