NASA "Mars yaşayış mühiti" təcrübələri üçün müraciətlərin qəbuluna başlayıb
ABŞ Milli Aeronavtika və Kosmik Agentliyi (NASA) Yer üzündə "Mars yaşayış mühiti" yaradaraq gələcək missiyaların insanlara təsirini araşdıracaq təcrübələrin ikincisində iştirak edəcək komanda üçün müraciətlərin qəbuluna başlayıb.
NASA-nın internet saytında verilən açıqlamaya görə, "Crew Health and Performance Exploration Analogue" (CHAPEA) adlı bir illik "Mars yaşayış mühiti" təcrübələrinin ikincisi gələn ilin yazında başlayacaq.
NASA-nın ABŞ-ın Texas əyalətindəki Hyuston obyektlərində həyata keçiriləcək üç təcrübədən ikincisində iştirak edəcək 4 nəfərlik komanda üçün müraciətlər açılıb.
Bir il davam etməsi planlaşdırılan ikinci "Mars yaşayış mühiti" təcrübəsində könüllülərin Mars missiyası zamanı qarşılaşa biləcəkləri çətinliklər, məsələn, resursların məhdudluğu, avadanlıqların sıradan çıxması, ünsiyyətin gecikməsi və digər ətraf mühitin stresi kimi amillər olacaq.
Təcrübə zamanı könüllülər qrupunun ayda gəzinti, robot əməliyyatları, yaşayış mühitinin idarə edilməsi, məşq etmək və məhsul yetişdirmək kimi tapşırıqları yerinə yetirməsi gözlənilir.
Könüllülər 3D printerlər vasitəsilə istehsal edilən "Mars Dunes Alpha" adlı sığınacaqda yaşayacaqlar.
CHAPEA-nın ikinci missiyası üçün namizədlərdən sağlam, siqaret çəkməyən, amerikalı və ya ölkədə daimi yaşayan, 30-55 yaş arası, tapşırıqlar və komanda ünsiyyəti üçün kifayət qədər ingilis dilini bilməsi, həmçinin universitet baxımından lazımi tələblərə cavab verməsi gözlənilir.
NASA eksperiment iştirakçılarına haqq ödəniləcəyini və ərizələrin aprelin 2-dək qəbul ediləcəyini açıqlayıb.
Qeyd edək ki, bir il davam edəcək üç təcrübədən birincisi 25 iyun 2023-cü ildə başlayıb.
