Tramp 2029-cu ilə qədər Meksika ilə sərhəddə divar tikməyi planlaşdırır
ABŞ prezidenti Donald Tramp Meksika ilə sərhəddə divar tikintisinin 2029-cu ildə dövlət başçısı kimi ikinci müddətinin sonuna qədər tamamlanacağını gözləyir.
AFN.az xarici mediaya istinadən xəbər verir ki, bunu ABŞ-ın vitse-prezidenti Ceyms Devid Vens deyib.
"Prezident Donald Tramp ümid edir ki, səlahiyyət müddətinin sonuna qədər biz bütün sərhəd divarını tamamlayacağıq. Və təbii ki, biz fiziki strukturdan, sərhəd divarının özündən danışırıq", - deyə o, Meksika ilə sərhəddə, Texas ştatının İql Pass şəhərində keçirdiyi mətbuat konfransında deyib.
Venslə yanaşı, ABŞ müdafiə naziri Pit Heqset və Milli Kəşfiyyatın direktoru Tulsi Qabbard ABŞ-ın cənub sərhədindəki miqrant böhranına görə əraziyə səfər edirlər.
ABŞ vitse-prezidenti həmçinin qeyd edib ki, o, sərhəd mühafizəsinin effektivliyini artıran süni intellektdən istifadə etməklə müxtəlif texnoloji həllərlə tanış olub. Onun sözlərinə görə, miqrasiya böhranının həlli hazırkı Amerika administrasiyası üçün prioritet məsələdir.
Qeyd edək ki, Tramp andiçmə mərasimindən dərhal sonra ABŞ-Meksika sərhədində fövqəladə vəziyyət elan edən sərəncam imzalayıb.
