BMT: Əfqanıstandakı zəlzələ bölgədəki su çatışmazlığını daha da pisləşdirdi
Birləşmiş Millətlər Təşkilatının (BMT) Baş katibinin sözçüsü Stefan Dujarrik bildirib ki, avqustun 31-də Əfqanıstanda baş verən zəlzələ bölgədə onsuz da mövcud olan su problemini daha da ağırlaşdırıb.
Dujarrik Nyu-Yorkdakı BMT Baş Qərargahında keçirilən gündəlik mətbuat konfransında Əfqanıstanda baş verən zəlzələ ilə bağlı açıqlamalar verib.
Əfqanıstanın Pakistan sərhədinə yaxın bölgəsində baş verən zəlzələ ilə bağlı son məlumatları paylaşan Dujarrik qeyd edib ki, 6 bal gücündəki zəlzələ nəticəsində əvvəllər daşqın fəlakətləri səbəbilə zərər görmüş su mənbələrinin vəziyyəti daha da pisləşib.
BMT-nin humanitar yardım işçilərinin zəlzələ bölgəsində fəaliyyətlərini davam etdirdiyini bildirən Dujarrik təbii fəlakətdən təxminən 84 min nəfərin zərər çəkdiyini və 6700 evin dağıldığını qeyd edib.
Dujarrik həmçinin təsdiqləyib ki, zəlzələdə həyatını itirənlərin sayı 2205-ə, yaralıların sayı isə 3640-a çatıb.
