Qızılın unsiyası atəşkəs elanı ilə 4850 dolları ötüb
Qızılın unsiyasının qiyməti ABŞ Prezidenti Donald Trampın ölkəsi ilə İran arasında əldə olunan və İsraili də əhatə edən müvəqqəti atəşkəsi elan etməsindən sonra 3 faizdən çox bahalaşaraq 4 min 850 dollar səviyyəsini keçib.
AFN.az xəbər verir ki, Tramp Hörmüz boğazının tamamilə nəqliyyat üçün açılması şərti ilə İranla iki həftəlik qarşılıqlı atəşkəsi qəbul etdiyini açıqlayıb.
Bu hadisə Yaxın Şərqdəki gərginliyin qlobal bazarlar üzərindəki təzyiqini azaltsa da, makroiqtisadi qeyri-müəyyənliklər qızıl qiymətlərini dəstəkləməyə davam edib. Spot bazarda əvvəlki gün 1,2 faiz yüksələn qızılın unsiyası atəşkəs elanından sonra bu gün 3,1 faiz artımla 4850 dolların üzərinə çıxaraq son üç həftənin ən yüksək göstəricisinə çatıb. Dolların qlobal valyutalar qarşısında zəifləməsi qızılın qiymətindəki artım meylini dəstəkləyən digər amil olub. Asiya fond bazarlarında isə indekslər 2 faizdən çox qazanc əldə edib.
Yaxın Şərqdə müharibənin başladığı 28 fevraldan bəri təxminən 10 faiz dəyər itirən qızıl son günlərdə atəşkəs ümidləri və qlobal artımdakı ləngimə gözləntiləri ilə bərpa olunmağa başlayıb. Qızıldakı bahalaşmaya paralel olaraq gümüşün qiymətində də kəskin artımlar müşahidə olunub. Belə ki, gümüşün unsiyası spot bazarda 5 faizdən çox dəyər qazanaraq 77 dollar səviyyəsini ötüb.
Kriptovalyuta bazarlarında isə dolların zəifləməsi ilə birlikdə fərqli meyllər izlənilir. Bazar dəyərinə görə ən böyük kriptovalyuta olan "Bitcoin" son 24 saat ərzində 4,50 faiz artaraq 71 min dollar səviyyəsində qərarlaşıb. "CoinMarketCap" analiz şirkətinin məlumatına görə, qlobal kriptovalyuta bazarının ümumi dəyəri 24 saat ərzində 4,11 faiz artaraq 2 trilyon 450 milyard dollara çatıb. Bakı vaxtı ilə saat 10:00 radələrində 71 min 737 dollardan ticarət edilən "Bitcoin"in həftəlik qazancı 5 faiz olaraq qeyd edilib. Bazar dəyərinə görə ikinci sırada yer alan "Ethereum" isə 6 faizdən çox bahalaşaraq 2 min 230 dollar səviyyəsinə yüksəlib.
