Aviasiyada reaktiv yanacaq böhranı: Sektora necə təsir edir?
Yaxın Şərqdəki münaqişələrin təsiri ilə reaktiv yanacaq xərclərinin iki dəfə artması qlobal aviasiya sektorunda böyük əməliyyat böhranına yol açıb.
AFN.az xəbər verir ki, bu böhranın ən ağır zərbəsini alan ABŞ-ın aşağı büdcəli aviaşirkəti "Spirit Airlines" bütün uçuşlarını dayandırdığını və fəaliyyətinə son verdiyini açıqlayıb.
Şirkətin Tramp administrasiyasından gözlədiyi 500 milyon dollarlıq xilas paketinin ləğv edilməsi 34 illik aviaşirkətin sonunu gətirib. Digər tərəfdən, maliyyə təzyiqləri altında olan "United Airlines" bilet qiymətlərini 20 faiz artırmağı planlaşdırdığı halda, "Lufthansa Qrupu" yaxın altı ay ərzində 20 min uçuşunu ləğv etmək qərarı alıb.
Avropa və Böyük Britaniyada aviaşirkətlər artan xərcləri sərnişinlərin üzərinə qoymağa başlayıblar:
- "Air France-KLM": Uzaq məsafəli uçuşlarda bilet başına 50 avro əlavə rüsum.
- "KLM": Gəlirli olmayan 150 Avropa reysinin ləğvi.
- "American", "Delta" və "Alaska Air": Baqaj rüsumlarının artırılması.
Asiya bazarında da vəziyyət oxşardır. "Cathay Pacific", "AirAsia" və "Thai Airways" uçuş tezliyini azaldarkən yanacaq əlavə rüsumlarını 10-35 faiz arasında artırıblar.
Mütəxəssislər qlobal aviasiya sənayesinin ciddi bir transformasiya və bahalaşma dövrünə girdiyini bildirirlər.
