SpaceX ABŞ Kosmik Qüvvələri üçün iki məxfi uçuş həyata keçirib
ABŞ-ın SpaceX şirkətinin Kaliforniya ştatından ABŞ Kosmik Qüvvələri üçün altı gün ərzində ikinci məxfi raket buraxılışını həyata keçirdiyi bildirilir.
AFN.az xəbər verir ki, son buraxılış zamanı Falcon 9 raketi ABŞ Kosmik Qüvvələrinin USSF-627 adlı məxfi missiyasını orbitə daşıyıb.
Space.com-un məlumatına görə, SpaceX-ə məxsus Falcon 9 raketi Kaliforniyadakı Vandenberq Kosmik Qüvvələr Bazasından buraxılıb.
SpaceX hər iki missiya ilə bağlı təfərrüatları açıqlamayıb. Falcon 9 raketlərinin birinci pillələri Yerə qayıtdıqdan sonra şirkət canlı yayımları dayandırıb.
Şirkət noyabrın 6-da da eyni bazadan USSF-432 adlı oxşar missiya çərçivəsində Falcon 9 raketini kosmosa göndərmişdi.
Bəzi ekspertlər hesab edirlər ki, buraxılışlar zamanı ABŞ Kosmik Qüvvələrinə dünyanın müxtəlif yerlərindəki potensial hədəfləri izləməyə kömək edən Kosmik Bazalı Aşkarlama və Hədəfləmə Proqramı çərçivəsində SpaceX-in Starshield peykləri orbitə çıxarılmış ola bilər.
