Çində Tesla-nın 3 milyona yaxın avtomobili geri çağırılıb
Elektrikli avtomobillərin ikonik dizaynlarından birinə çevrilən minimalist gizli qapı tutacaqları Çində 4 milyondan çox avtomobili əhatə edən nəhəng geri çağırma əməliyyatının mərkəzində yer alıb.
AFN.az xəbər verir ki, aralarında 2,98 milyon Çin istehsalı və idxal olunan Tesla-nın da olduğu geri çağırma qərarı fövqəladə hallarda qapı tutacaqlarının müəyyən edilməsinin və açılmasının çətin olması səbəbilə qəbul edilib. Prosesdən XPeng, Xiaomi və Geely kimi Çinli avtomobil istehsalçıları da təsirlənib.
Tesla-nın geniş yaydığı girintili qapı tutacağı dizaynı avtomobilin kuzovuna inteqrasiya olunmuş vəziyyətdədir və sürücü yaxınlaşdıqda çölə doğru uzanır.
Lakin Xiaomi markalı avtomobillərin qarışdığı və elektrik nasazlığı səbəbilə qapıların açıla bilmədiyindən şübhələnilən iki ölümlə nəticələnən qəzanın ardından bu dizayn təhlükəsizlik baxımından araşdırmaya alınıb.
Tesla tərəfindən mövzu ilə bağlı verilən açıqlamada Model 3, Y, S və X avtomobillərinin qapı tutacaqlarının daxili üzlük rənginə yaxın olması səbəbilə fərq edilməsinin və işə salınmasının çətin olması səbəbindən geri çağırıldığı bildirilib.
Şirkət bunun qəza zamanı aşağı gərginlik sisteminin sıradan çıxması kimi hallarda avtomobilin içərisində olan şəxslərin və ya xilasedici qrupların qapıları sürətlə açmasına mane ola biləcəyini bildirib.
Tesla təsirlənən avtomobillərə xəbərdarlıq etiketləri yapışdıracağını və toqquşmadan sonra şüşələri avtomatik endirən bir proqram təminatı yeniləməsi yayımlayacağını açıqlayıb.
Təsirlənən şirkətlərin dünyanın qalan hissəsi üçün oxşar geri çağırma planlaşdırıb-planlaşdırmadığı hələlik məlum deyil.
Sino Auto Insights şirkətinin təsisçisi Tu Le 2014-cü ildən etibarən Çin markalarının Tesla Model S-in dəbli görünüşünü sürətlə kopyalaması ilə gizli qapı tutacaqlarından istifadənin qartopu kimi böyüdüyünü bildirib. Le xəbərdarlıq etiketləri və proqram təminatı yeniləmələrinin qalıcı həll yolu əvəzinə müvəqqəti tədbir olduğunu da əlavə edib.
Çin hakimiyyəti fevral ayında gizli qapı tutacaqlarını qadağan edəcəyini açıqlamışdı. 1 yanvar 2027-ci ildə qüvvəyə minəcək yeni qaydalara əsasən, Çində satılacaq avtomobillərin həm daxili, həm də xarici qapılarında mexaniki açma mexanizminin olması məcburi olacaq.
Tesla-nın qapı tutacaqları qəfil işləməyi dayandırdığı və uşaqların avtomobildə ilişib qaldığı barədə məlumatlardan sonra ABŞ təhlükəsizlik tənzimləyicilərinin də araşdırmasına cəlb edilib.
ABŞ Milli Yol Hərəkəti Təhlükəsizliyi İdarəsi iyul ayında bütün avtomobil istehsalçıları üçün yeni rəsmi təhlükəsizlik standartının yaradılmasını təklif etmişdi.
