Minnesotada yaşayan azərbaycanlı xeyriyyəçi xanım- FOTOLAR
Bacarıqlı, işgüzar, iradəli xanımdır. Təbiət qoynuna səyahəti xoşlayır. İdmanla mütəmadi məşğul olur. Mütəliə etməkdən yorulmur. İki kitab üzərində işləyir. İngilis dilində tezliklə işıq üzü görəcək bu kitabların qəribə adları da var- "Geriyə səyhət" və "Nənəmə məktublar: yenidən salınan köklər"...
…Ömür-gün yoldaşı Bencemin Bentli amerikalıdır. 2003-cü ildə ailə qurublar. Minnesota ştatının Manketo şəhərində vergi müfəttişi işləyir. İki övladı var, böyük oğlu Kaleb 14, ikinci oğlu Rəsul isə 10 yaşındadılar. Hər iki oğlunun əsl azərbaycanlı kimi böyüməyinə çalışır...
Deyir ki,- "Azadlıq təşnəsi ilə yaşayanlar onu təbii halında hiss etmək istəyirlərsə buyurub Amerikaya gələ bilərlər. Amma bir şeyi unutmasınlar ki, kiminsə hesabına burada yaşamaq mümkün deyil. Yalnız və yalnız möhkəm iradə, bacarıq və savadla hansısa səviyyəyə yüksəlmək olar"…
Haqqında söhbət açdığım Vüsalə Əzizova- Bentli Xaçmaz rayonunda dünyaya gəlib. 1995-ci ildə orada 1 nömrəli məktəbin 9-cu sinfini bitirərək Sumqayıt Musiqi Kollecinin Quba filialına qəbul olunub və bir neçə ildən sonra oranı piano müəllimi ixtisası ilə başa vurub. 1999-2001-ci illərdə Odlar Yurdu Universitetinin tərcümə fakultəsində təhsil alıb. 2001-ci ildə Amerikanın Azərbaycandakı səfirliyinin Azadlığa dəstək proqramının xətti ilə ABŞ-ın Pensilvaniya ştatının Filadelfiya şəhərinə gəlib. Burada Dreksel Universitetində bir ay hazırlıq kursu keçəndən sonra Minnesota Universitetinin Moorhead filialında amerikaşünaslıq fakultəsinə qəbul olunub. 2004-cü ildə oranı bakalavr dərəcəsi ilə bitirib. Sonra iki il Azərbaycanda yaşayıb. 2006-cı ildə yenidən ABŞ-a qayıdıb. Bu dəfə Viskansn Dövlət Universitetində oxuyaraq orta hüquq işçisi ixtisasına yiyələnib. 2006-2012-ci illərdə Viskansndakı "Ailə və işçilərin hüquqları" idarəsində vəkil köməkçisi işləyib. 2012-2015-ci illərdə həmin ştatın sığorta şirkətlərindən birində çalışıb…
…2012-ci ildə Amerika Federal Təhqiqat Bürosunda işləmək şansı yaranır. Beş min namizədin arasından seçilərək iki yüz adamdan biri olur. Və "Navy Sean Stew Smith" proqramı üzrə təlim də keçir. Amma onu qane edən iş təklifi almır, sonda qərara gəlir ki, hüquqi biliklərini və fiziki bacarıqlarını başqa istiqamətə yönəltsin…
2015-ci ildən Minnesota ştatının Manketo şəhərində yaşayır. 2016-2017-ci illərdə ABŞ-ın Milli İdman Akademiyasında oxuyub. O, buranı üç ixtisas üzrə bitirib- düzgün qidalanma, yoqa və idman. Bu ixtisasların hər hansı birindən təlim keçmək üçün ona xüsusi lesenziyalar da verilib...
2017-ci ildə "Bentley Mediation and Drafting" şirkətini təsis edərək fərdi şəkildə hüquq məsləhətçisi kimi fəaliyyət göstərir. Eyni zamanda "VUSA Fitness" şirkətini yaradıb və fitneslə bağlı məhz həkimlərə xüsusi proqram üzrə təlimlər keçir…
Çox xeyirxah insandır. Xüsusi mobil çörək bişirən maşın alıb ki, pitsa bişirib sata bilsin və əldə olunan vəsaiti imkansızlara, daha doğrusu müharibədə vuruşmuş keçmiş əsgərlərə, xəstələrə, süd verən analara, azyaşlı məktəblilərə çatdırsın. Hər ilin may ayından başlayaraq sentyabr ayınadək bu məqsədlə xeyriyyə marafonu keçirir. Həmin xeyriyyə marafonu haqqında Minnesotanın qəzet və jurnallarında çox yazılıb…
Deyir ki,- "Nənəm Əminə Ağadadaşova qubalı Ağa Məhəmməd Əfəndinin qızı olub. Mənim bir insan kimi formalaşmağımda onun böyük rolu var. Ondan xeyirxahlığı, əliaçıqlığı, imkansıza yardım etməyi öyrənmişəm"…
Artıq nə söyləmək olar? Yaxşı deyiblər- "Əl tutmaq Əlidən qalıb". Qoy amerikalılar da Vüsalə xanımın timsalında azərbaycanlıların necə xeyirxah bir xalq olduğunun şahidi olsunlar…
Elman Eldaroğlu,
ABŞ, Miçiqan
