Mail.ru istifadəçiləri üçün yeni və daha ciddi təhlükə
AppStore platforması ötən gün VK Holdinqə daxil olan bir çox resursları silib. Hazırda bu Holdinqə daxil olan Vkontakte sosial şəbəkəsi, VK Play, "VK Музыка", "VK Клипы" "VK Мессенджер", "VK Админ", "Почта Mail․ru" və "Облако Mail.ru" mobil servisləri AppStore platformasında görsənmir.
VK özünün bir çox mobil tətbiqlərinin silinməsini təsdiqləyib. Eyni zamanda əvvəldən yüklənənlərin hələlik işlədiyini bildirib.
AFN.az xəbər verir ki, qlobalda monitorinq aparan Netblocks da VK mobil tətbiqlərinin dünyanın heç bir yerində artıq əlçatan olmadığını təsdiqləyib.
Böyük ehtimalla Apple-dən sonra qısa müddətdə Google də bu addımı atacaq və Play marketdən də adı çəkilən resurslar silinə bilər. Məsələyə münasibət bildirən İT mütəxəssisi Osman Gündüzün sözlərinə görə, belə olan halda bu resurslardan istifadə edən bizim vətəndaşlarımızı da ciddi problem gözləyəcək: "Onlar üçün bu resurslar sadəcə əlçatan olmayacaq, datalar itəcək, bu emailə bağlı olan digər servislərdə problem yaranacaq və s.
Bildiyim qədər, Azərbaycanda hələ də xeyli sayda insanlar Mail.ru servisindən istifadə edir. Həm də bu emaildən istifadə edərək müxtəlif servislərdə (Facebook, İnstagram, TikTok və s.) qeydiyyatdan keçənlər var. Baxmayaraq ki, hələlik Google bu addımı atmayıb, adı çəkilən servislərin veb versiyası işləkdir, amma tövsiyə ondan ibarətdir ki, Mail.ru dan istifadə edənlər ləngimədən digər servislərə (Gmail və s.) keçsinlər. Məktubların daşınmasını Mail.ru-ya etibar etməyin nəticəsini biz hələ 2008-də Rusiyanın Gürcüstana hücumu zamanı görmüşük. Mail.ru datanı və kontaktları yeni Gmail ünvana köçürmək elə də problem yaratmır. Gmail-də belə imkanlar nəzərdə tutulub. Amma gərək bu addım zamanında atılsın".
Rusiya hökuməti və VK rəhbərliyi baş verənlərlə bağlı Apple şirkətinə sorğu göndərib. O.Gündüz xatırladıb ki, "VK Holdinq"in rəhbəri Vladimir Kiriyenkodur: "O isə hazırda Ukraynanın işğal olunan ərazilərində keçirilən referenduma rəhbərlik edən Rusiya Prezident Administrasiyası rəhbərinin birinci müavini Sergey Kiriyenkonun oğludur. Hansı ki, ata və oğul , hər ikisi sanksiya altındadır. Holdinqin London Fond Birjasında fəaliyyəti də Rusiyaya tətbiq edilən sanksiyalar çərçivəsində dayandırılıb".
Mütəxəssisin sözlərinə görə, bir neçə gün öncə Apple və Google şirkətlərinin keçmiş rəhbərləri Ukrayna Prezident Administrasiyasında görüşlər keçirmişdilər: "Baş verənlərdə güman ki, bu görüşlərin də "izi" olmamış deyil. Müharibə başlayandan sonra AppStore-dən Rusiyaya məxsis 7000 mobil tətbiqin silindiyi bildirilir. Azərbaycan Elektron Təhlükəsizlik Xidmətinin də bu məsələlərlə bağlı istifadəçilərə tövsiyyəsi faydalı olardı".
