Deputat sığorta şirkətlərini ödənişdən yayınmaqda ittiham edib
"Azərbaycanda xeyli sayda sığorta şirkəti olsa da, vətəndaşların bu xidmətdən narazılığı çoxdur".
AFN xəbər verir ki, bunu Milli Məclisin deputatı Razi Nurullayev parlamentin bu gün keçirilən plenar iclasında deyib.
Onun sözlərinə görə, xüsusilə avtonəqliyyat vasitəsi sahiblərinin mülki məsuliyyətinin icbari sığortası ilə bağlı sığorta şirkətlərindən ödəniş almaq çətindir.
"Bu cür sığorta hadisələri zamanı şirkətlər əlindən gələni edir ki, ya ödəniş etməsin, ya da az məbləğ ödəsin. Mən özüm də xeyli müddət əvvəl sığorta şirkətlərindən biri ilə bu cür hal yaşadım. Rəhbərliklə danışmaq istədim, telefona bir qız cavab verdi, bilmədim canlıdır, yoxsa robot. İnsanlar tanıyıram ki, o qədər bezdiriblər ki, sığorta ödənişindən imtina ediblər", - deyə o, qeyd edib.
