BDU-nun müəlliminin evindən 54 min manat oğurlandı
Bakıda universitet müəlliminin mənzilindən külli miqdarda pul oğurlamış xidmətçi qadın və qeyri-rəsmi nikahda yaşadığı həyat yoldaşına hökm oxunub.
AFN qafqazinfo-ya istinadən xəbər verir ki, Bakı Ağır Cinayətlər Məhkəməsində Cinayət Məcəlləsinin 177.3.2-ci (külli miqdarda oğurluq) maddəsi ilə təqsirləndirilən 1981-ci il təvəllüdlü Sonaxanım Məmmədova və 1975-ci il təvəllüdlü Xaliq Məmmədovun hər birinə 6 il müddətinə həbs cəzası verilib.
Araşdırmalar zamanı məlum olub ki, Sonaxanım Məmmədova Bakı Dövlət Universitetinin müəllimi N.Əhmədovun evində aylıq 400 manata xadimə işləyib. O, özünə olan inam və etibardan sui-istifadə edərək hissə-hissə olmaqla N.Əhmədovun mənzilindən 54 min manata yaxın pul oğurlayıb. S.Məmmədova vəsaitin bir hissəsinə özünə “Nissan Murano” markalı avtomobil alıb, həmçinin qızının cehizinə görə yaranmış kredit borcunu ödəyib.
İttiham aktında qeyd edilib ki, Sonaxanım Xaliq Məmmədovla birgə avtomobili alaraq təmir etməyə 30 min manatdan çox pul veriblər. Həmçinin qadının işlədiyi evdən pul götürdükdən sonra bu barədə vatsap proqramında ona məlumat verməsi barədə mesajlar aşkar edilib.
Məhkəmədə S.Məmmədova və həyat yoldaşı ittihamı qəbul etməyiblər. S.Məmmədova avtomobili öz vəsaiti hesabına aldığını, N.Əhmədovun həyat yoldaşı tərəfindən şərləndiriyini bildirib. O iddia edib ki, evdəki pul ev sahibinin arvadının tanıdığı şəxs tərəfindən götürülə bilər. Təqsirləndirilən şəxs son vaxtlarda ev sahibinin xanımının onu qəsdən bir neçə dəfə evdən pul götürməyə yönəldərək kameraya düşməsini, guya həmişə pulların onun tərəfindən oğurlanması görüntüsü yaratmağa çalışdığını qeyd edib.
Məhkəmə təqsirləndirilən şəxslərin dediklərini özünümüdafiə fikirləri kimi qəbul edib və ər-arvad haqqında ittihamedici hökm çıxararaq onların hər birinə 6 il həbs cəzası verib.
