Pakistanın Azərbaycandakı səfiri Qərbi Azərbaycan İcmasını ziyarət edib
Pakistan İslam Respublikasının Azərbaycandakı fövqəladə və səlahiyyətli səfiri Bilal Hayee Qərbi Azərbaycan İcmasını ziyarət edib.
Səfir Hayee İcmanın İdarə Heyətinin sədri Əziz Ələkbərli və üzvlərlə görüş keçirib, İcmanın nizamnaməsi, strukturu və fəaliyyəti haqqında məlumat alıb.
Görüşdə İcmanın rəhbərliyi - İdarə Heyətinin (İH) sədri, Milli Məclisin deputatı Əziz Ələkbərli, İH sədr müavini, millət vəkili Hikmət Babaoğlu, İcmanın sözçüsü Ülviyyə Zülfiqar iştirak ediblər.
Qərbi Azərbaycan İcmasının İdarə Heyətinin sədri Əziz Ələkbərli dost və qardaş ölkə olan Pakistanın ölkəmizdəki səfiri Bilal Hayeeni İcmada görməkdən şad olduğunu bildirib. İcma sədri pakistanlı diplomata son 200 ildə azərbaycanlıların başlarına gətirilən müsibətlər barədə danışıb, ötən əsr boyunca dörd dəfə - 1905-06, 1918-20, 1948-53 və 1987-91-ci illərdə onların öz ata-baba yurdundan, indi Ermənistan adlanan coğrafi məkandan deportasiya edilməsi, bu hadisələr zamanı soydaşlarımıza qarşı törədilmiş insanlıq əleyhinə cinayətlər barədə məlumat verib.
Görüş zamanı aparılan söhbət əsnasında səfirin diqqətinə çatdırılıb ki, Ermənistan hökuməti qovulmuş azərbaycanlıların hüquqlarını bərpa etmək sahəsində tədbir görməkdən imtina edir və onları vətənlərində yaşamaq hüququndan istifadə imkanından məhrum etməkdə davam edir. İcma bununla bağlı Ermənistanın baş naziri Nikol Paşinyana müraciət etsə də, diloqa çağırış cəhdləri cavabsız qalır.
Qeyd olunub ki, Qərbi azərbaycanlıların geriqayıdış hüququ ilə bağlı beynəlxalq miqyasda edilən müraciətlərimizə mötəbər təşkilatlar tərəfindən reaksiyalar gəlməkdədir. BMT İcmanın 4 sənədini – Qayıdış Konsepsiyası da daxil olmaqla öz rəsmi sənədi kimi yayıb, UNESCO və Aİ-dən İcmaya rəsmi şəxslər tərəfindən cavablar gəlib. Bildirilib ki, beynəlxalq ictimaiyyətin dəstəyinə bundan sonra da ehtiyac var.
Səfir Bilal Hayee Pakistanın hər zaman qardaş Azərbaycanın haqlı mübarizəsində yanında olduğunu və bundan sonra da olmağa davam edəcəyini bildirib.
Bilal Hayee daha sonra İcmanın inzibati binası ilə tanış olub.
Əziz Ələkbərli xatırladıb ki, icma son 200 ildə öz torpaqlarından qovulmuş insanların yaratdığı bir təşkilatdır: “Bizim 300 minə yaxın soydaşımız indiki Ermənistan ərazisindən qovulub. Bu gün Qarabağ məsələsi yekunlaşıb, sülh müqaviləsi imzalanarsa, o zaman 300 min insanın da öz evlərində yaşamaq hüququ təmin olunmalıdır. Biz bununla bağlı bir sıra beynəlxalq təşkilatlara müraciət etmişik. İstəyimiz 35 il əvvəl qovulduğumuz evlərimizə sülh şəraitində qayıtmaqdır”.
“Bununla əlaqədar Ermənistan Baş nazirinə də müraciət etmişik. İstəyirik ki, Azərbaycan vətəndaşlığı alıb bu ölkədə yaşayan ermənilər kimi azərbaycanlı soydaşlarımız Ermənistana qayıdıb orada yaşaya bilsinlər. Lakin təəssüf ki, Nikol Paşinyan bizim çağırışlarımıza cavab vermir”, - Ə.Ələkbərli vurğulayıb.
