Dünyada humanitar yardıma ehtiyacı olan insanların sayı 363 milyonu ötüb
Dünyada köməyə ehtiyacı olan insanların sayı 2023-cü ilin avqust ayı etibarilə 363,3 milyona yüksəlib.
AFN.az xarici mediaya istinadən xəbər verir ki, 2022-ci ildə bu rəqəm 324,3 milyon nəfər təşkil edib. Artıma səbəb müharibələr, iqlim dəyişikliyi və COVID-19 epidemiyası yaratdığı sosial-iqtisadi çətinliklər göstərilir.
Böyük Britaniyada yerləşən "İnkişaf Təşəbbüsləri" tərəfindən hazırlanan i "2023 Qlobal Humanitar Yardım" hesabatında 2022-ci ildə humanitar böhranın bütün dünyada dərinləşdiyi bildirilib.
Hesabata görə, humanitar yardıma ehtiyacı olan insanların dörddə üçü münaqişə, iqlim böhranı və ya sosial-iqtisadi zəiflik faktorlarından ən azı ikisinin təsirinə məruz qalır.
Bildirilir ki, humanitar yardıma ehtiyacın artmasının əsas səbəblərindən ikisi ərzaq böhranı və məcburi miqrasiyadır.
Son 2 ildə 60 ölkədə təxminən 265,7 milyon insanın kəskin qida çatışmazlığından əziyyət çəkdiyi müəyyən edilib.
İqlim dəyişikliyi isə 236,7 milyon insana mənfi təsir göstərir.
Qeyd olunub ki, Rusiya-Ukrayna müharibəsi, Pakistan və Şərqi Afrikadakı iqlim dəyişikliyi böhranı, COVID-19 epidemiyasının sosial-iqtisadi təsirləri humanitar yardım hərəkətlərinin əhəmiyyətini artırıb.
