Arktikada Rusiya təhlükəsi
Arktikada alovlanan yeni qlobal müharibədə Qərbin böyük problemləri var və Rusiya artıq buz qıran texnologiyaları sayəsində bu müharibədə qalib gəlir.
Bunu Britaniyanın "Daily Mail" qəzetinin köşə yazarı Devid Averre deyib. Müəllif qeyd edib ki, Rusiya strateji cəhətdən özünü Arktikada hökmranlıq yarışında ön sıralarda yerləşdirib və təbii ehtiyatları, ticarət yolları və onlarla buzqıran gəmi də daxil olmaqla dünyanın ən böyük müasir donanması ilə qalib gəlir. Eyni zamanda, Britaniyanın "RAND Europe" analitik institutunun müdafiə və Avropa təhlükəsizliyi üzrə eksperti Nikolas Xuan qeyd edib ki, Böyük Britaniya və ABŞ-da müvafiq olaraq yalnız bir və iki əməliyyat buzqıran gəmisi var. O, bunu NATO ilə rəqibləri arasında əsas qabiliyyət boşluğu kimi görür.
Britaniya ordusunun veteranı və hazırkı Civitas analitiki Rob Klark Rusiyanın Arktikada hökmranlığının yaratdığı təhlükədən şikayətlənib. Nəşr onun sözlərindən sitat gətirir: “Bütün diqqətlər Ukraynada olduğu halda, Rusiya Arktikada yeni nəsil nüvə sualtı qayıqları və hipersəs raketlərini sınaqdan keçirir və regionda mövcudluğunu artırır”.
Bundan əlavə, material müəllifi Rusiyanın BMT-nin Dəniz Hüququ Konvensiyasına uyğun olaraq Arktika sahilləri boyunca gəmiçilik fəaliyyətinə, naviqasiyaya və resursların inkişafına nəzarət etdiyinə diqqət çəkib. Bu səbəbdən xarici gəmilər bu sularda üzmək üçün Rusiyadan icazə istəməli olur və yol boyu onlara rus buzqıran gəmiləri kömək edir.
