Saxta əlillik dərəcəsi verməkdə təqsirləndirilən həkim bəraət aldı
Bakı Apellyasiya Məhkəməsində vəzifə səlahiyyətlərindən sui-istifadə etmədə və vəzifə saxtakarlığında təqsirləndirilən Könül Sultanovanın barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az xəbər verir ki, hakim Elmar Rəhimovun sədrliyi ilə keçirilən prosesdə qərar elan olunub.
Qərara əsasən, apellyasiya şikayəti təmin edilməyib, Binəqədi Rayon Məhkəməsinin çıxardığı hökm ləğv edilib və təqsirləndirilən şəxsə bəraət verilib. Könül Sultanovanın barəsində seçilən başqa yerə getməmək haqqında iltizam qətimkan tədbiri ləğv edilib.
Xatırlatma: Binəqədi Rayon Məhkəməsinin hökmü ilə K.Sultanovaya 3 min manat məbləğində cərimə kəsilib. Bakı Apellyasiya Məhkəməsinin qərarına əsasən, birinci instansiya məhkəməsinin hökmü dəyişdirilmədən, apellyasiya şikayəti isə təmin edilmədən saxlanılıb. Ali Məhkəmə isə qərarı tamamilə ləğv edib, işə yenidən baxılması üçün apellyasiya instansiyası məhkəməsinə göndərib.
Qeyd: Rəsmi məlumata əsasən, K.Sultanova 2021-ci ildə Baş prokuror yanında Korrupsiyaya qarşı Mübarizə Baş İdarəsi əməkdaşları tərəfindən saxlanılıb.
“Aparılan istintaqla İcbari Tibbi Sığorta üzrə Dövlət Agentliyinin “Tibbi Ərazi Bölmələrinin İdarəetmə Birliyi” PHŞ-in 15 saylı şəhər Poliklinikasının Həkim Məsləhət Komissiyasının üzvləri Mehparə Məmmədova və K.Sultanovanın öz vəzifə səlahiyyətlərindən sui-istifadə edərək fəaliyyət göstərdikləri Komissiyaya müraciət edən şəxslərə əlillik dərəcəsinin verilməsinə nail olmaq məqsədilə onların xəstəlikləri barədə məlumatları bilərəkdən ağırlaşdırıb təhrif edilən formada rəsmi elektron informasiya resursuna daxil etmələrinə, bununla da dövlətin qanunla qorunan mənafelərinə mühüm zərər vurmalarına əsaslı şübhələr müəyyən olunub”, - Baş Prokurorluğun məlumatında bildirilirdi.
Hər iki vəzifəli şəxs Cinayət Məcəlləsinin 308.1 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə təqsirləndirilən şəxs qismində cəlb edilib, cinayət işləri aidiyyəti üzrə məhkəməyə göndərilib.
M.Məmmədovanın cinayət işi ayrıca icraata ayrılıb.
