Haiti baş naziri istefa verib
![](/uploads/posts/2024-03/1710227142_haitibas.jpg)
Baş nazir Ariel Henri Haitidə quldur dəstələrinin törətdiyi zorakılıq və gərgin etirazlardan sonra tutduğu vəzifədən istefa verib.
Qayana Prezidenti və Karib Hövzəsi İcmasının (CARICOM) sədri İrfaan Əli açıqlamasında belə deyib: “Biz Haitidə müvəqqəti prezident şurasının yaradılmasına dair razılaşmadan sonra Baş nazir Ariel Henrinin istefasını qəbul etdik".
CARICOM-a üzv olan 25 ölkənin dövlət başçıları Haitidəki təhlükəsizlik böhranını müzakirə etmək üçün Yamaykanın Kinqston şəhərində fövqəladə toplantı keçirib.
Görüşdən sonra martın 5-dən təhlükəsizlik səbəbiylə Puerto Rikoda gözləyən Henri istefa qərarını CARICOM-a çatdırıb.
Yerli mətbuatda dərc olunan xəbərlərdə zorakılığın davam etdiyi ölkədə dəstə üzvlərinin 2 polis bölməsinə və Daxili İşlər Nazirliyinə basqın etdiyi, lakin polis tərəfindən dəf edildiyi bildirilib.
Minlərlə məhbusun həbsxanadan qaçmasına səbəb olan dəstə lideri “Barbekü” ləqəbli Cimmi Çerizier martın 6-da verdiyi açıqlamada Baş nazir Henrinin istefa vermədiyi təqdirdə “Haiti ya hamı üçün cənnət, ya da hamı üçün cəhənnəm olacaq" - deyə bildirib.
Henrinin istefasını tələb edən silahlı dəstələr martın 2-də və 3-də Port-au Prince və Croix des Bouquets bölgəsi yaxınlığındakı iki həbsxanaya silahlı hücum edərək təhlükəsizlik qüvvələri ilə toqquşub. Qarşıdurmalar zamanı 4 minə yaxın məhbus həbsxanadan qaçıb, 12 nəfər həyatını itirib.