BƏƏ: Əbu-Dabidə məhv edilən ballistik raketin qəlpələri 6 nəfəri yaralayıb
Birləşmiş Ərəb Əmirlikləri paytaxt Əbu-Dabiyə atılan ballistik raketin məhv edilməsi zamanı düşən qəlpələr səbəbindən üçüncü dəfə yanğın çıxdığını və hadisədə yaralı sayının 6-ya yüksəldiyini açıqlayıb.
AFN.az xəbər verir ki, Əbu-Dabi Hökuməti Media Ofisinin "X" sosial media platformasındakı hesabından verilən bəyanatda hava hücumundan müdafiə sistemlərinin ballistik raketi uğurla zərərsizləşdirdiyi bildirilib.
Lakin müdaxilədən sonra düşən qəlpələrin Əbu-Dabi Xəlifə İqtisadi Zonasında (KEZAD) 5 Hindistan və 1 Pakistan vətəndaşının yaralanmasına səbəb olduğu qeyd edilib. Açıqlamada həmçinin vurğulanıb ki, raket qəlpələri KEZAD yaxınlığındakı üçüncü bir nöqtədə yanğına səbəb olub, lakin bütün yanğınlar nəzarətə götürülüb.
BƏƏ Müdafiə Nazirliyi bundan əvvəl yaydığı məlumatda İrandan ballistik raket və pilotsuz uçuş aparatları (PUA) ilə hücumlar təşkil edildiyini, hava hücumundan müdafiə sistemlərinin isə bu hücumların qarşısını almağa çalışdığını bəyan etmişdi. Hazırda hadisə yerində soyutma işləri davam etdirilir.
