ABŞ-da benzinin qiyməti 2022-ci ildən bəri ilk dəfə 4 dolları ötdü
Yaxın Şərqdəki qarşıdurmalar neft qiymətlərinin kəskin artmasına səbəb olarkən, ABŞ-da benzinin orta qiyməti 2022-ci ildən bəri ilk dəfə olaraq qalon başına 4 dollar səviyyəsini keçib.
AFN.az xəbər verir ki, Amerika Avtomobil Assosiasiyasının (AAA) məlumatlarına görə, dünən 3,99 dollar olan benzinin orta qalon qiyməti bu gün təxminən 4,02 dollara yüksəlib.
Beləliklə, ABŞ-da benzinin orta qiyməti 2022-ci ilin avqust ayından bəri ilk dəfə 4 dollar həddini aşıb. Ölkədə benzin qiymətləri əvvəlki həftə ilə müqayisədə 1 faiz, ötən ayla müqayisədə isə təxminən 35 faiz artıb. İllik artım tempi isə təxminən 27 faiz olaraq hesablanıb.
Tədarük vəziyyəti və tətbiq olunan vergi dərəcələrinə görə ştatlar üzrə fərqlənən qiymətlər Kaliforniyada qalon başına 5,89 dollara yaxınlaşıb. Bu ştatı 5,45 dollarla Havay, 5,35 dollarla Vaşinqton, 4,93 dollarla isə Oreqon və Nevada izləyib. Ümumilikdə ölkənin 12 ştatında və paytaxt Vaşinqtonda benzinin orta qiyməti 4 dollardan yuxarı qeydə alınıb.
Dizel yanacağının orta qalon qiyməti də bir ay əvvəllə müqayisədə 45 faiz artaraq 5,45 dollara çatıb. Yanacaq qiymətlərindəki bu sıçrayışda Yaxın Şərqdəki gərginliklərin yaratdığı tədarük zənciri problemləri və istehsal fasilələri nəticəsində qlobal neft qiymətlərinin yüksəlməsi əsas rol oynayıb. Xatırladaq ki, ABŞ-da benzinin orta qalon qiyməti 2022-ci ilin iyununda təxminən 5,02 dollarla rekord səviyyəyə çatmışdı.
