"Xaricə səfər", etibarnaməsiz sürücü...- Cavanşir Feyziyev niyə yalan danışır?
AFN-in xəbər verdiyi kimi, Xəzər rayonunda bir qadının ölümü ilə nəticələnən yol-qəza hadisəsinin Milli Məclisin deputatı Cavanşir Feyziyevə məxsus “Porsche Cayenne GTS” markalı, 90 FC 111 dövlət qeydiyyat nişanlı avtomobil tərəfindən törədildiyi ortaya çıxıb.
Hadisə fevralın 15-də Xəzər rayonu Qala qəsəbəsi ərazisində baş verib. Belə ki, “Porsche Cayenne GTS” markalı, 90 FC 111 dövlət qeydiyyat nişanlı avtomobil Mərdəkan istiqamətində hərəkət edərkən qadını vurub. İlkin məlumata görə, zərbənin gücündən yolun əks istiqamətinə düşən qadın “Wolksfagen Passat” markalı, 99 CD 689 nömrə nişanlı avtomobilin altında qalıb və yerindəcə keçinib.
Ölən qadının 1975-ci il təvəllüdlü Sevinc Cabir qızı Hüseynova olması müəyyənləşdirilib.
Deputat dünən mətbuata açıqlamasında qəza törədilən zaman sükan arxasında özünün deyil, sürücüsünün olduğunu bildirib: “Qəza baş verən zaman mən Bakıda olmamışam. Mən ayın 12-dən Brüsseldə səfərdəyəm. Bakıya yeni qayıtmışam. Maşını idarə edən sürücüm olub. Adam qəza törədib, araşdırılır, kim günahkardırsa, cəzasını da çəkəcək. Adətən, mən ölkədə olmayanda sürücüm öz maşınını idarə edir. Bu qədər illər ərzində birinci dəfədir ki, belə hadisə baş verir. Hesab edirəm ki, burada qeyri-adi nə isə yoxdur. Qəza hər kəsin başına gələ bilər, heç kəs bu cür hadisələrdən sığortalanmayıb. Kim yalandan deyir, guya, qəza vaxtı mən sükan arxasında olmuşam və sairə, Allah özü onların cəzasını verəcək”.
Meydan TV Cavanşir Feyziyevin hadisə zamanı Bakıda olub-olmamasını araşdırıb. Məlum olub ki, deputat dediyi kimi, fevralın 12-də deyil, ötən ay Brüsseldə səfərdə olub. Bu barədə “Azərtac”ın məlumatında deyilir.
Məlumatda səfərin yanvarın 31-də yekunlaşdığı bildirilir.
Qeyd edək ki, AFN olaraq məsələni araşdırmaqda davam edirik, müvafiq qurumlara bununla bağlı sorğular ünvanlamışıq. Onu da xatırlatmağımız yerinə düşər ki, hadisə zamanı sükan arxasında olduğu bildirilən Abbasov Fərdi Həsənağa oğlunun həmin avtomobili istifadə etmək üçün heç bir hüququ olmayıb. “Porsche Cayenne GTS” markalı, 90 FC 111 dövlət qeydiyyat nişanlı avtomobil C.Feyziyevin adına olmaqdan əlavə, onu idarə etmək üçün müxtəlif illərdə iki nəfərə etibarnamə verilib ki, onların da heç biri Abbasov Fərdi Həsənağa oğlu deyil. Təbii, onu da istisna etmirik ki, adıçəkilən şəxs deputatın sürücüsü ola bilər və bu zaman onun etibarnaməyə ehtiyacı olmamalıdır. Lakin məsələ ondadır ki, hadisə haqda ilkin məlumatı yayan publika.az saytı Abbasov Fərdi Həsənağa oğlunun "Avromed" şirkətində çalışdığını yazıb. Belə olduqda xeyli cavabsız suallar qalır ki, bunun da düzgün istintaq əməliyyatları ilə ortaya çıxarılacağına ümid edirik.
