Avtobuslarda gediş haqqı artacaq? - RƏSMİ CAVAB
Azərbaycanda ictimai nəqliyyatda bahalaşmanın olacağı barədə fikirlər səsləndirilir.
AFN xəbər verir ki, bahalaşma qərarı isə Bakı Nəqliyyat Agentliyinin (BNA) taksilərin vahid qiymət siyasəti ilə əlaqələndirilir.
Belə ki Bakıda fəaliyyət göstərən avtobuslarda gediş haqqının 30 qəpikdən 50 qəpiyə qaldırılacağı barədə iddialar ortaya atılıb. Mövzunun əhəmiyyətini nəzərə alaraq və gediş haqqının artacağı ilə bağlı iddiaların nə qədər doğru olmasını dəqiqləşdirmək məqsədilə Bakı Nəqliyyat Agentliyinə müraicət etdik.
Qurumdan BAKU.WS-ə bildirildi ki, gediş haqqının artırılacağı ilə bağlı yayılan məlumatlar həqiqətə uyğun deyil və əsassızdır:
"Ölkədə dövlət tənzimlənməsi tətbiq edilən qiymətlərin (tariflərin), xidmət haqlarının dövlət tənzimlənməsini həyata keçirən kollegial icra hakimiyyəti orqanı - Azərbaycan Respublikasının Tarif Şurasıdır. Bakı şəhərində müntəzəm sərnişindaşıma sahəsində dövlət nəzarətini həyata keçirən qurum olaraq Bakı Nəqliyyat Agentliyi tərəfindən qeyd edilən məsələ ilə bağlı Tarif Şurasına müraciət edilməyib və bu məsələ hazırda gündəmdə deyil.
Bu gün gündəmdə duran əsas məsələ əhaliyə göstərilən ictimai nəqliyyat xidmətlərinin keyfiyyətini artırmaq, rahat və təhlükəsiz sərnişindaşımaların təşkilinə nail olmaqdır".
