Bu şəxslərə təkrar əlillik təyin edilmədi
"Əvvəlki dövrlərdə hərbi səbəblərlə əlaqədar təyin edilmiş müddətli əlilliklərinin uzadılması üçün barələrində e-sistemə göndəriş daxil edilmiş, eləcə də, əlillik sənədlərindəki diaqnozlarda ziddiyyətlər aşkar edilən 18 şəxs əyani müayinə əsasında qiymətləndirməyə cəlb olunub”.
Hit.az xəbər verir ki, bu barədə Dövlət Tibbi-Sosial Ekspertiza və Reabilitasiya Agentliyi məlumat yayıb.
Bildirilib ki, Dövlət Tibbi Sosial Ekspertiza və Reabilitasiya Agentliyi, Müdafiə Nazirliyinin və digər müvafiq qurumların hərbi həkim ekspert komissiyaları, İcbari Tibbi Sığorta üzrə Dövlət Agentliyi nümayəndələrindən ibarət komissiya həmin şəxslərin əlillik sənədləri ilə bərabər, mövcud sağlamlıq vəziyyətlərinin də əlillik təyinatına uyğun olub-olmadığını araşdırıb:
"Əyani müayinəsi aparılmış 18 nəfərdən doqquz nəfərin xəstəlik diaqnozlarının və sağlamlıq vəziyyətlərinin əlillik təyinatına əsas vermədiyi müəyyən olunub.
Bu səbəbdən onlara təkrar əlillik təyin olunmasından imtina qərarı verilib”.
