Salyanda baş verən qətlin təfərrüatları məlum olub
Salyanda baş verən qətl hadisəsinin bəzi təfərrüatları məlum olub.
AFN.az Report-a istinadən xəbər verir ki, Masallı rayon sakini, 1959-cu il təvəllüdlü Məmmədov Etibar Qüdrət oğlu idarə etdiyi “VAZ-2107” markalı avtomobillə Salyan-Neftçala avtomobil yolu ilə Neftçala rayonuna doğru hərəkət edib.
Sürücü naməlum şəxs və ya şəxslər tərəfindən qətlə yetirilib. İzi itirmək məqsədilə meyit Salyan-Neftçala avtomobil yolundan iki kilometr aralıda yeləşən Salyan rayonunun Xocalı kəndinə aparılıb və kənd sakinlərindən birinin həyət evinin darvazasının qarşısına atılıb. Sonra qətldə əli olan şəxs və ya şəxslər geri qayıdarkən “VAZ-2107” markalı avtomobili rayonun Kürqaraqaşlı kənd ərazisindən keçən su kanalına aşıraraq qaçıblar.
Ötən gün hüquq-mühafizə orqanları tərəfindən aparılan əməliyyat-axtarış tədbirləri nəticəsində içərisində qan izləri olan “VAZ-2107” markalı avtomobil sözügedən ərazidə aşkar edilərək götürülüb.
Hazırda qətldə şübhəli bilinən şəxs və ya şəxslərin aşkar edilərək tutulması istiqamətində əməliyyat-axtarış tədbirləri davam etdirilir.
Qeyd edək ki, hadisə ötən gün axşam saatlarında qeydə alınıb. Naməlum kişi meyitinin Xocalı kəndində tapılması ilə bağlı Daxili İşlər Nazirliyi tərəfindən məlumat yayılıb.
Faktla bağlı araşdırma aparılır.
