Beş metrlik asteroid Yerdən qısa məsafədə uçacaq - təhlükə gözlənilirmi?
Yanvarın 26-da diametri təqribən 5-6 metr olan asteroid Yerdən cəmi bir neçə min kilometr aralıda uçacaq.
AFN.az NTV.ru-ya istinadən xəbər verir ki, rusiyalı astronom Gennadi Borisov Yerə doğru hərəkət edən diametri təxminən 5-6 metr olan asteroid aşkar edib. Obyektin kəşfi bir neçə rəsədxana tərəfindən təsdiqlənib və Kiçik Planetlər Mərkəzinin reyestrinə daxil edilib. Asteroid "2023 BU" müvəqqəti təyinatını alıb.
"2023 BU" asteroidi Yerə ən yaxın yaxınlaşmasını yanvarın 26-da həyata keçirəcək. Gennadi Borisov qeyd edib ki, asteroid Yerdən cəmi bir neçə min kilometr məsafədən keçəcəyinə baxmayaraq, təhlükəli deyil. Müqayisə üçün qeyd edək ki, Aydan Yerə olan məsafə orta hesabla 375 min kilometrdir. Bununla belə, diametri 150 metrdən çox olan asteroidlər potensial təhlükəli hesab olunur.
Astronom onu da bildirib ki, asteroid kifayət qədər parlaqdır, ona görə də onu cənub yarımkürəsində hətta həvəskar teleskoplarda da müşahidə etmək olar.
Fevralın 1-də isə planetimizdən sonuncu dəfə 50 min il əvvəl uçmuş yaşıl komet C / 2022 E3 (ZTF) Yerə minimum məsafədə yaxınlaşacaq. İlkin hesablamalara görə, az işıqlı ərazidə aydın bir gecədə kometi durbinlə, hətta adi gözlə görmək mümkün olacaq.
