Entoni Blinken Türkiyəyə səfər edəcək
ABŞ dövlət katibi Entoni Blinkenin Türkiyəyə səfəri planlaşdırılır.
AFN.az "Anadolu"ya istinadən xəbər verir ki, bu haqda Türkiyənin xarici işlər naziri Mövlud Çavuşoğlu bildirib. Ankarada NATO-nun baş katibi Yens Stoltenberqlə birgə mətbuat konfransında danışan Çavuşoğlu səfərin fevralın 20-də baş tutacağını açıqlayıb. Səfər zəlzələlərdən əvvəl planlaşdırıldığını deyən XİN rəhbəri bildirib ki, Blinken bazar günü fəlakət bölgəsində olacaq: "Bazar ertəsi isə onunla danışıqlar aparacağıq. Görüş zamanı İsveç və Finlandiyanın NATO-ya üzv qəbul olunması prosesi də müzakirə mövzusu olacaq” - deyə Çavuşoğlu vurğulayıb.
Səfər çərçivəsində Ukrayna münaqişəsi ətrafında vəziyyətin müzakirə ediləcəyi də gözlənilir.
ABŞ Dövlət Departamenti də dövlət katibinin səfəri ilə bağlı məlumat yayıb. Bildirilir ki, Entoni Blinken fevralın 16-dan 22-dək Almaniya, Türkiyə və Yunanıstana rəsmi səfərlər edəcək.
