Bu il Türkiyədə 1060 meşə yanğını baş verib
Bu il iyulun 31-nə olan məlumata görə, Türkiyə ərazisində 1060 meşə yanğını baş verib, 7190 hektar əraziyə ziyan dəyib. Açıqlanan rəsmi statistikaya görə, yanğınların 48 faizi səhlənkarlıq, ehtiyatsızlıq və bədbəxt hadisələr səbəbindən törəyib.
İqlim dəyişikliyinin mənfi təsiri ilə keçən il və bu il quraqlıq, meşə yanğınları, daşqınlar kimi fəlakətlər bütün dünyaya təsir edir. Mütəxəssislər bununla bağlı neqativ halların yaxın illərdə təsirini daha da artıracağını müəyyən ediblər. Hər bir ölkə bu fəlakətlərlə mübarizə aparmaq üçün öz imkanları daxilində komandalarını və texniki imkanlarını artırmağa çalışır.
Türkiyədə meşə yanğınları ilə mübarizə üç strategiya ilə aparılır: qarşısının alınması, söndürülməsi və bərpası. Profilaktika işləri çərçivəsində təlim və maarifləndirmə və texniki işlərə üstünlük verilir, söndürmə və bərpa işlərinə yanğın zamanı və sonrasında sahə tədqiqatları daxildir.
Xüsusilə Meşə Həftəsi və 11 Noyabr Milli Ağaclandırma Günündə təbiət sevgisini yaymaq, meşə yanğınlarına qarşı maarifləndirmə tədbirləri həyata keçirən Kənd Təsərrüfatı və Meşə Təsərrüfatı Nazirliyi 20 ildə 7 milyard fidanı bir araya gətirib.
25 min şəxsi heyətlə 120 min könüllü yanğınla mübarizə aparır
Bütün maarifləndirmə fəaliyyətlərinə və texniki tədqiqatlara baxmayaraq, meşə yanğınları öz təsirini artırmaqda davam edir. Bu il iyulun 31-nə olan məlumata görə, Türkiyə ərazisində 1060 meşə yanğını baş verib, 7190 hektar əraziyə ziyan dəyib.
Sözügedən dövrdə ən çox meşə yanğınları Egey və Aralıq dənizi bölgələrində baş verib. Bu yanğınlardan ən çox zərər çəkən İzmirdə 1550 hektar meşə sahəsi zərər görüb.
Qeyd olunan tarixə baş vermiş meşə yanğınlarının mənbəyi araşdırıldığında 509 (48 faiz) səhlənkarlıq, ehtiyatsızlıq və bədbəxtlik, 33 (3 faiz) qəsd, 92 (9 faiz) ildırım vurma və 426 (40 faiz) müəyyən edilməmiş səbəblərdən baş verdiyi müəyyən edilib.
Bu il meşə yanğınları ilə mübarizədə 25 min şəxsi heyət və 120 mindən çox yanğınsöndürən könüllü iştirak edib. İyulun 29-na kimi yanğın bölgələrində fəaliyyət göstərən 100 helikopterdən 31 min 238 ton su, 24 təyyarədən isə 5 min 600 ton su atılıb.
