Çin Tayvana qarşı güc tətbiq etmək niyyətində deyil - ABŞ generalı
Çin Tayvana qarşı hərbi güc tətbiq etmək niyyətində deyil, bunun əvəzinə Pekin adaya nəzarəti bərpa etmək üçün başqa vasitələrdən istifadə etməyə çalışacaq.
Bu haqda ABŞ Silahlı Qüvvələrinin Baş Qərargah Rəisləri Komitəsinin sədri, general Çarlz Braun danışıb.
“Düşünürəm ki, Çin prezidenti Si Cinpin Tayvanı zorla almaq istəməz. O, başqa üsullardan istifadə etməyə çalışacaq”, - deyə hərbi lider Tokioda jurnalistlərə bildirib.
General əlavə edib ki, Birləşmiş Ştatlar adaya qarşı hər hansı potensial Çin hərbi əməliyyatı üçün güclü maneə təmin etmək istəyir. Bununla yanaşı, Braun Si Cinpinin Tayvana təzyiqi artırmaq üçün istifadə edə biləcəyi hərbi, diplomatik və iqtisadi üsulları izləməyə çağırıb.
Amerikanın Axios portalının məlumatına görə, Çinin xarici işlər naziri Van Yi Vaşinqtona son səfəri zamanı Çinin iki ölkənin müdafiə nazirlikləri arasında rabitə kanallarını bərpa etməyə hazır olduğunu açıqlayıb. Onların işi 2022-ci ildə Pekin tərəfindən ABŞ Nümayəndələr Palatasının o vaxtkı sədri Nensi Pelosinin Tayvana səfərinə etiraz olaraq dayandırılmışdı. Portalın qeyd etdiyi kimi, iki ölkənin hərbi idarələri arasında təmasların bərpa olunmasını ölkə liderləri noyabrın 15-də San-Fransiskoda keçiriləcək görüş zamanı rəsmi şəkildə elan edə bilərlər.
