Aktotı Raimkulova Prezidentin xüsusi nümayəndəsi ilə görüşüb
Dekabrın 9-daTürk Mədəniyyəti və İrsi Fondunun prezidenti Aktotı Raimkulova Azərbaycan Prezidentinin Şuşa rayonunda xüsusi nümayəndəsi Aydın Kərimov ilə Şuşa şəhərində görüşüb.
Bu haqda xəbər sözügedən Fonddan daxil olub.
Xəbərdə bildirilir ki, “A.Raimkulova ilk dəfə Şuşanı ziyarət etməsindən qürur və sevinc hissləri yaşadığını vurğulayaraq, Azərbaycan xalqını 44 günlük Vətən müharibəsində qazandığı böyük Zəfər münasibəti ilə ürəkdən təbrik edib. Fondun rəhbəri müasir Azərbaycan dövlətinin banisi, Türk Dünyası qarşısında böyük tarixi xidmətlər göstərmiş Ulu Öndər Heydər Əliyevin 100 illik yubileyinin ölkədə və beynəlxalq miqyasda təntənəli keçirilməsinə diqqət çəkib”.
Sonra xəbərdə deyilir ki, “Aydın Kərimov təşkilatın rəhbərinə yeni vəzifəsində uğurlar arzulayaraq, qardaş türk xalqları arasındakı son illər ərzində daha da güclənən həmrəyliyi yüksək qiymətləndirib. Prezidentin xüsusi nümayəndəsi Azərbaycanın işğaldan azad edilmiş ərazilərində bərpa-quruculuq işlərinə dair Dövlət Proqramının prioritet istiqamətlərindən və məqsədlərindən bəhs edib. Görüşdə 2023-cü il üzrə Türk Dünyasının Mədəniyyət paytaxtı olan Şuşa şəhərinin Türk dövlətlərində və onların hüdudlarından kənarda tanıdılması istiqamətində Fond tərəfindən həyata keçirilən layihələr, Fond və Şuşa Şəhəri Dövlət Qoruğu İdarəsinin cari il ərzində davam edən birgə fəaliyyətləri və gələcək tərəfdaşlıq istiqamətləri müzakirə olunub”.
Eyni zamanda Şuşa şəhərinin ICESCO tərəfindən 2024-cü il üzrə “İslam dünyasının mədəniyyət paytaxtı” elan olunması ilə növbəti il ərzində də beynəlxalq ictimaiyyətin diqqət mərkəzində olacağı qeyd edilib.
Həmçinin Fondun prezidenti Şuşanın 30 ilə yaxın davam edən işğalı nəticəsində burada yerləşən mədəni abidələrə, tarixi əsərlərə və ümumiyyətlə şəhərin görünüşünə dəyən ziyan ilə tanış olub, hazırda aparılan bərpa və yenidənqurma işləri ilə bağlı məlumatlandırılıb.
A.Raimkulova rəhbərlik etdiyi təşkilatın yenidənqurma proseslərinə töhfə verməyə hər zaman hazır olduğunu vurğulayıb.
