İnterpoldan internet üzərindən törədilən yeni cinayətlərlə bağlı xəbərdarlıq
İnterpol xəbərdarlıq edib ki, süni intellektə malik rəqəmsal dünyaların sayının artması virtual aləmdə törədilən cinayətlərin araşdırılmasını çətinləşdirir.
Qurum Davosda keçirilən Dünya İqtisadi Forumunun (WEF) illik sammitində hüquq-mühafizə orqanlarının nöqteyi-nəzərindən metaversenin əsas çağırışları, təhdidləri və zərərlərinin hərtərəfli təhlilini təqdim edən hesabatını dərc edib.
Hesabatda rəqəmsal dünyaların artan yayılmasının müstəntiqlər üçün böyük problem yaratdığı, virtual dünyaların birdən çox ölkənin məhkəmə orqanlarının yurisdiksiyasına düşə biləcəyi, müvafiq sistem və cihazların mürəkkəb və uyğunsuz olduğu bildirilib.
Hesabatda insanların heç bir fiziki sübutun olmadığı, yalnız kriptovalyutalar kimi virtual aktivlərlə rəqəmsal qarşılıqlı əlaqənin olduğu virtual cinayət səhnələri ilə qarşılaşa biləcəyi, bu cür onlayn mühitlərin dinamik olduğu və sübutların asanlıqla itirilə biləcəyi və ya görünə biləcəyi ifadə edilib.
İnterpolun hesabatında rəqəmsal dünyaların hüquq-mühafizə orqanları üçün simulyasiyalar və virtual cinayət yeri təhlükəsizliyindən tutmuş virtual təlimə qədər müxtəlif imkanlar təklif etdiyi qeyd edilib və hüquq-mühafizə orqanlarının və ədliyyə sisteminin virtual dünyanı və onunla əlaqəli texnologiyanı anlaması lazım olduğu vurğulanıb.
“Bu, virtual mühitin təhlükəsizliyini təmin etmək və orada fərdin hüquqlarını qorumaq üçün lazımdır”, - deyə hesabatda bildirilir. Vurğulanıb ki, bu inkişaf edən kriminal mühitə effektiv cavab tapmaq üçün beynəlxalq əməkdaşlıq mühüm olaraq qalır.
"Metaverse kimi güclü texnologiyaların ortaya çıxması cinayət mühitini getdikcə daha mürəkkəb və transmilli edir və hüquq-mühafizə orqanlarını yeni çağırışlarla qarşı-qarşıya qoyur. Metaverse və süni intellekt cinayət fəaliyyətləri üçün yeni çağırışlardır, hansı ki, dünya buna tam hazır deyil" - deyə İnterpolun baş katibi Yurgen Stok bildirib.
