ABŞ Şimali Koreyalı hakerlərin kiberhücumları barədə xəbərdarlıq edib
ABŞ Federal Təhqiqat Bürosu (FTB) Şimali Koreyalı hakerlərin həssas kəşfiyyat və məlumat toplamaq üçün kiberhücumlarda e-poçt boşluğundan istifadə etdiyini və bu baxımdan diqqətli olmaq lazım olduğunu bildirib.
“United Press International” (UPI) xəbər verir ki, Federal Təhqiqat Bürosu tərəfindən verilən açıqlamada Şimali Koreyalı hakerlərdən ibarət “Kimsuky” qrupunun üzvlərinin beyin mərkəzləri, akademik institutlar və media qurumlarına fişinq e-poçtları göndərdiyi bildirilib.
Qeyd edilib ki, Şimali Koreyalı hakerlər göndərdikləri elektron məktublarda özlərini jurnalist və ya akademik kimi təqdim ediblər və müxtəlif vasitələrlə, xüsusən də səhv konfiqurasiya edilmiş domen ad sistemi (DNS) vasitəsilə öz kimliklərini gizlədə biliblər.
Şimali Koreyanın bu fişinq e-poçtlarından geosiyasi fəaliyyətlər, düşmən ölkələrin xarici siyasət strategiyaları və Pxenyan administrasiyasının maraqlarına toxunan hər hansı məlumatlarla bağlı kəşfiyyat məlumatları toplamaq üçün istifadə etdiyi, şəxsi sənədlərin, araşdırmaların və danışıqların qanunsuz olaraq hədəfə alındığı bildirilib.
Qeyd olunub ki, Şimali Koreyalı haker özünü beyin mərkəzinin əməkdaşı kimi təqdim edərək ABŞ dövlət rəsmisini Şimali Koreyada keçiriləcək konfransa dəvət edib, digər haker isə Şimali Koreya ilə bağlı geosiyasi məsələlərə münasibət bildirmək istəyən jurnalist obrazı yaradıb.
O xəbərdarlıq edib ki, hakerlər hədəflə əlaqə saxladıqdan sonra qurbanın hesabını və ya şəbəkəsini poza biləcək zərərli bağlantılar və əlavələr olan e-poçtları izləməyə cəhd edə bilərlər.
Qeyd olunub ki, "Kimsuky"nin əsas missiyası siyasi analitiklər və digər ekspertlərdən istifadə etməklə oğurlanmış və qiymətli geosiyasi məlumatları Şimali Koreyaya çatdırmaq olub.
"Kimsuky"nin Şimali Koreya hərbi kəşfiyyat agentliyinin nəzdində işlədiyi güman edilir. Haker qrupu digər kibertəhlükəsizlik tədqiqatçıları tərəfindən "Emerald Sleet, Thallium and Velvet Chollima" kimi də tanınır.
