ABŞ "Apple"ın "Alibaba" ilə müqavilə bağlamasından narahatdır
ABŞ "Apple" ilə "Alibaba" arasında AI razılaşmasından narahatdır
AFN.az xəbər verir ki, ABŞ rəsmiləri Apple şirkətinin Çinin "Alibaba" texnologiya nəhəngi ilə süni intellekt sahəsində planlaşdırdığı əməkdaşlıq barədə narahatlıq ifadə ediblər.
"The New York Times"ın məlumatına görə, ABŞ hökumət nümayəndələri "Apple" rəhbərliyi və lobbiçiləri ilə görüşlər keçirərək razılaşmanın detalları barədə suallar veriblər. Onlar "Apple"ın "Alibaba" ilə hansı məlumatları paylaşacağı, Çin tənzimləyiciləri ilə hansı hüquqi öhdəlikləri üzərinə götürəcəyi ilə maraqlanıblar.
Vaşinqtonda narahatlıq doğuran əsas məsələ, bu əməkdaşlığın "Alibaba"nın AI texnologiyalarını gücləndirə biləcəyi, Çin chatbotlarının əhatə dairəsini genişləndirə və "Apple"ın Çin qanunlarına daha çox tabe olmasına səbəb ola biləcəyidir.
Qeyd olunur ki, "Apple" may ayında Çində "iPhone" üçün süni intellekt xidmətlərini istifadəyə verməyə hazırlaşır. Yeni xidmətlər yalnız Çində alınmış iPhone cihazlarında aktiv olacaq. Ölkə xaricində alınmış, lakin Çinə gətirilən cihazlarda bu AI funksiyaları işləməyəcək. Eyni zamanda, təqdim olunacaq süni intellekt alqoritmləri yerli qanunvericiliyə uyğun olaraq senzura olunmuş məzmun təqdim edəcək.
