"Air Canada" yanacaq böhranı səbəbindən uçuşlarını azaldır
Qlobal reaktiv yanacaq qiymətlərindəki kəskin artım hava yolu nəqliyyatına zərbə vurmağa davam edir.
AFN.az xəbər verir ki, "Air Canada" artan xərclər səbəbindən ABŞ-a yönəlmiş dörd mövsümi marşrutunu planlaşdırılandan daha tez dayandıracağını açıqlayıb.
Hörmüz boğazındakı neft blokadası və bölgədəki münaqişələrin təsiri ilə reaktiv yanacaq qiymətlərinin iki dəfədən çox artması dünya miqyasında aviaşirkətləri daşıma imkanlarını azaltmağa məcbur edir.
Aviaşirkət bu marşrutlar üzrə tam xidmətin 2027-ci ilin yayında bərpa olunmasının planlaşdırıldığını bildirib.
Ləğvlərdən təsirlənən sərnişinlərə alternativ səyahət variantları və ya bilet pullarının geri qaytarılması təklif olunacaq.
Yanacaq böhranı təkcə "Air Canada"ya deyil, digər Kanada daşıyıcılarına da təsir göstərir.
"WestJet" aprel ayında tutumunu 1 faiz azaltdığı halda, bu göstəricinin iyun ayında 6 faizə qədər yüksələcəyini bəyan edib.
"Porter Airlines" və "Air Transat" kimi şirkətlər də artan xərcləri kompensasiya etmək məqsədilə bilet qiymətlərinə əlavə rüsumlar tətbiq edəcəklərini və ya qiymət artımına gedəcəklərini açıqlayıblar.
"Air Canada" ötən ay da iqtisadi cəhətdən səmərəli hesab etmədiyi altı daxili və transsərhəd marşrutunu dayandırdığını açıqlamışdı.
Aviasiya ekspertləri xəbərdarlıq edirlər ki, enerji bazarlarındakı dalğalanma davam etdiyi müddətcə uçuşların ləğvi və bilet qiymətlərindəki artım qaçılmaz olacaq.
