Brent neftinin bir barreli 89,56 dollardan satılır
Brent neftinin bir barreli beynəlxalq fyuçers bazarlarında 89,56 dollardan satılır.
AFN.az xəbər verir ki, dünən 90,03 dollara qədər yüksələn Brent neftinin oktyabr fyuçers müqaviləsi üzrə bir barrelinin qiyməti günü 88,91 dollardan tamamlayıb.
Brent neftinin bir barrelinin qiyməti bu gün saat 10:30 etibarilə əvvəlki bağlanışla müqayisədə 0,73 faiz artaraq 89,56 dollar olub.
Eyni dəqiqələrdə Qərbi Texas tipli (WTI) xam neftin sentyabr fyuçers müqaviləsi üzrə bir barrelinin qiyməti də 83,85 dollar təşkil edib.
Neft qiymətlərinin yüksəlməsində Hörmüz boğazının yenidən açılacağına dair gözləntilərin zəifləməsi və bölgədə tədarük məhdudiyyətlərinin davam edə biləcəyi ilə bağlı narahatlıqlar təsirli olub.
ABŞ ilə İran arasında gərginliyin yenidən artacağı təqdirdə Hörmüz boğazı üzərindən həyata keçirilən neft daşımalarının pozula biləcəyi ilə bağlı narahatlıqlar qiymətləri dəstəkləməyə davam edərkən, bölgədə ticarət gəmilərinə qarşı təhlükəsizlik risklərinin davam etməsi də tədarüklə bağlı narahatlıqları artırır.
Dünən ABŞ ilə İran arasında sürətli razılaşmanın əldə olunacağına dair gözləntilərin zəifləməsi və Hörmüz boğazının normal dəniz nəqliyyatına açılması ilə bağlı qeyri-müəyyənliyin davam etməsi fonunda Brent neftinin bir barreli beynəlxalq fyuçers bazarlarında 90 dolları test etmişdi.
Digər tərəfdən, Amerika Neft İnstitutu ABŞ-ın kommersiya xam neft ehtiyatlarının ötən həftə əvvəlki həftə ilə müqayisədə 9 milyon 72 min barrel artdığını açıqlayıb. Bazar gözləntisi ehtiyatların 500 min barrel azalacağı istiqamətində idi. Gözləntilərin əksinə qeydə alınan güclü ehtiyat artımı ABŞ-da tələbin perspektivi ilə bağlı narahatlıqları artıraraq qiymətlərdəki yüksəlişi məhdudlaşdırır.
ABŞ Enerji İnformasiya Administrasiyasının gün ərzində rəsmi ehtiyat məlumatlarını açıqlaması gözlənilir.
Brent neftində texniki baxımdan 89,78 dolların müqavimət, 89,08 dolların isə dəstək səviyyəsi kimi izlənilə biləcəyi bildirilir.
