Kolumbiyada zəlzələdə ölənlərin sayı 294-ə yüksəlib
Kolumbiyada avqustun 10-da baş verən 7,4 maqnitudalı zəlzələdə həyatını itirənlərin sayı 294-ə çatıb.
AFN.az xəbər verir ki, Milli Fəlakət Risklərinin İdarə Edilməsi Bölməsi (UNGRD) ölkəni vuran 7,4 maqnitudalı zəlzələdən sonra son vəziyyətlə bağlı açıqlama yayıb.
Açıqlamaya görə, zəlzələdə həyatını itirənlərin sayı 294-ə çatıb, yaralıların sayı 3 min 935-ə, itkin düşənlərin sayı isə 320-yə yüksəlib.
Zəlzələnin 15 vilayətdə 448 qəsəbədə təsirli olduğu, 54 min 8 ailənin, yəni ümumilikdə 115 min 461 nəfərin fəlakətdən zərər çəkdiyi bildirilib.
Digər tərəfdən, hökumət yenidənqurma planı hazırlayır. Plan Prezident Abelardo de la Espriellanın göstərişləri ilə hazırlanacaq. İşlər çərçivəsində Milli Fəlakət Risklərinin İdarə Edilməsi Bölməsi, Mənzil Nazirliyi, bizneslər, yerli idarəetmə orqanları, dövlət və özəl sektor qurumları, maliyyə təşkilatları və əməkdaşlıq qurumları arasında koordinasiya təmin ediləcək.
Fəaliyyət və resursların koordinasiyası isə zərər çəkmiş ərazilərin yenidən qurulması üçün hökumət tərəfindən yaradılan “Möcüzə Fondu” vasitəsilə həyata keçiriləcək.
UNGRD-nin məlumatına görə, dünənə olan məlumata əsasən, zəlzələdən sonra 256 afterşok baş verib. Onlardan 17-nin maqnitudası 3,0-dan, ikisinin isə 4,0-dan böyük olub.
