Tayvan HHM raketlərinin sınağı üçün xüsusi kompleks yaradacaq
Tayvan ordusu yeni “Land Sword II” zenit-raket komplekslərinin sınağı üçün xüsusi infrastruktur yaradacaq.
AFN.az xəbər verir ki, bu barədə “Taipei Times” mənbələrə istinadən məlumat yayıb.
Bildirilir ki, Tayvan ordusu yeni sınaq infrastrukturunun tikintisini Çjunşan Elm və Texnologiya İnstitutuna (NCSIST) həvalə etməyi planlaşdırır. Layihənin büdcəsi 295 milyon Tayvan dollarından (təxminən 9,27 milyon ABŞ dolları) çox olacaq.
İndiyədək “Land Sword II” raketlərinin sınaqları üçün Tayvan Hərbi Dəniz Qüvvələrinin infrastrukturu və gəmilərindən istifadə olunub. Yeni kompleks yaradıldıqdan sonra quru qoşunları raketlərin sınağını müstəqil həyata keçirə biləcək.
Yeni infrastruktur radar siqnallarını və raketin uçuşunun orta mərhələsində yönləndirmə komandalarını imitasiya etməyə, həmçinin raket sistemlərinin tam diaqnostikasını aparmağa imkan verəcək.
“Land Sword II” sistemi “Sky Sword II” raketinin bazasında hazırlanıb. Sistem konteyner tipli buraxılış qurğusundan istifadə edir və raketlərin uçuş məsafəsi 2-15 kilometr təşkil edir. Raketlər nəqliyyat vasitəsindən uzaqdan buraxıla bilər.
