“YPG Suriyanın şimalında 750 İŞİD-çini həbsdən azad edib” – Ərdoğan
“YPG terror təşkilatı Suriyanın şimalında 750 İŞİD-çini həbsdən azad edib”.
APA-nın Türkiyə mətbuatına istinadla verdiyi xəbərə görə, bunu Türkiyə Prezidenti Rəcəb Tayyib Ərdoğan əcnəbi media nümayəndələri ilə görüşündə deyib.
Türkiyə Prezidenti bildirib ki, 750 İŞİD-çidən 195-i Türkiyə Silahlı Qüvvələri tərəfindən tutulub.
Tel Abyad və Rasulaynın terrorçulardan təmizləndiyini vurğulayan Ərdoğanın sözlərinə görə, YPG-nin 120 saat ərzində təhlükəsiz bölgədən geri çəkilməsinə ABŞ məsuliyyət daşıyır.
“Həyatımız boyu terror təşkilatları ilə mübarizə aparacaq halımız yoxdur. Suriya rejimi də terror təşkilatları ilə mübarizə aparmalıdır”, – deyə Ərdoğan qeyd edib.
O, Suriyanın şimalında 12 müşahidə məntəqəsinin qurulacağını da açıqlayıb.
