İstismarına icazə verilən binaların çıxarışla təmin olunması ilə bağlı işlər davam edir
İstismarına icazə verilən binaların çıxarışla təmin olunması ilə bağlı işlər davam edir. Bununla bağlı vətəndaşların yaşadıqları ünvanda səyyar xidmət göstərilir, ilkin sənədlər toplanır. Bütün bu işlər Azərbaycan Respublikasının Prezidenti İlham Əliyevin 2019-cu il fevralın 19-da imzaladığı “Bəzi çoxmənzilli binaların istismarına icazə verilməsinin sadələşdirilməsi haqqında” fərmanının icrası çərçivəsində reallaşdırılır.
Ümumilikdə Bakı şəhəri, digər şəhər və rayonlar üzrə 542 MTK, MMC və fiziki şəxslərə aid 900-dən çox binanın döngə nöqtələrinin koordinantları təyin edilib, kağız və elektron variantı aidiyyəti quruma göndərilib. Bakı şəhərində 218 MTK, MMC və fiziki şəxslərə aid binaların istismarına icazə aktı müvafiq qeydiyyat orqanına daxil olub. Bu rəqəm Gəncə şəhəri üzrə 3, Sumqayıt şəhərində 1, Abşeron rayonunda 4, Zərdab rayonu üzrə isə 1-dir.
Artıq Bakı şəhəri, digər şəhər və rayonlar üzrə 10 minə yaxın sənəd vətəndaşlardan qəbul edilib, bunlardan 9500-ü icra olunub, 500-ə yaxın sənəd isə hal hazırda icra prosesindədir. Müraciətlər daxil olduqda dərhal icraya yönəldilir.
Fərmanın icrası olaraq Bakı və Abşeron üzrə 7 MTK məxsus torpaqların təyinatının dəyişdirilməsi məqsədilə Nazirlər Kabineti qarşısında vəsatət qaldırılıb və Sərəncam layihələri müvafiq qaydada təqdim edilib.
Məqsəd vətəndaş məmnunluğunun təmin edilməsi, mənzil şəraitinin yaxşılaşdırılması, vətəndaş-məmur ünsiyyətinin azaldılması, o cümlədən vaxt itirmədən rahatlıqla əmlakların rəsmi qeydiyyata alınmasıdır. Həmçinin qeydiyyat prosedurlarının sadələşdirilməsi, sosiallıq prinsipinin təmin edilməsi, insan amilinin gücləndirilməsi də əsas vəzifələrdəndir.
İstismarına icazə verilən bina sakinləri əmlakına dair elektron çıxarışın hazırlanması üçün ilkin sənədlərlə birgə Əmlak Xidmətlərini Məkanına müraciət edə bilərlər. Bundan başqa prosesin daha intensiv aparılması üçün “Əmlakını qeydiyyata al və mülkiyyətinə sahib ol” kimi sosial kampaniyalar keçirilir. Hər həftə Bakının müxtəlif rayonlarında olan belə binaların həyətlərində, vətəndaşların ünvanlarında səyyar qeydiyyat xidməti göstərilir. Vətəndaşlar yaşadıqları məkana gətirilən mobil ofislərə şəxsiyyət vəsiqəsini, maliyyə arayışını, protokoldan çıxarışını təqdim edirlər.
Eyni zamanda belə bina sakinləri üçün daşınmaz əmlakın qeydiyyatı ilə bağlı maarifləndirmə tədbirləri də keçirilir. Maarifləndirmə çərçivəsində vətandaşlara bildirilir ki, artıq mənzil sahibləri çıxarışlarını kağız formasında deyil, elektron qaydada əldə edir. Həmin mülkiyyət sənədi şəxsin Elektron hökumət portalına yerləşdirilir. Çıxarışlar barədə bütün məlumatlar şəxsin telefon nömrəsinə və elektron poçt ünvanına göndərilir. Elektron qaydada göndərilən informasiyada çıxarışın reyestr, qeydiyyat nömrələri, elektron çıxarışın yoxlanılması ilə bağlı keçid linki göstərilir.
Məlumat üçün bildirilməlidir ki, adıçəkilən Fərmanın icra mərhələsində vətəndaşlar həm mobil ofislərə, həm də öz istəklərinə uyğun olan müvafiq quruma müraciət etməklə mənzillərini operativ qaydada qeydiyyata aldıra və sənədlərini əldə edə bilərlər. Proses davamlı olaraq həyata keçiriləcək.
