Səhiyyə Nazirliyi Gəncədə küçədən tapılan körpənin durumu barədə
Səhiyyə Nazirliyi Gəncədə küçədən tapılan körpənin durumu barədə məlumat yayıb.
Nazirlikdən virtualaz.org-a bildirilib ki, körpənin vəziyyəti normaldır.
"Gəncədə vətəndaşların küçədən taparaq Gəncə Şəhər 2 saylı Uşaq Xəstəxanasına gətirdikləri 3-4 günlük olan oğlan uşağının vəziyyəti barədə xəstəxanadan bildiriblər ki, uşaqda fiziki qüsur qeydə alınmayıb, vəziyyəti qənaətbəxş qiymətləndirilir. Hazırda həkimlərin nəzarəti altındadır.
Faktla əlaqədar artıq hüquq-mühafizə orqanlarına da məlumat verilib", - nazirlikdən bildirilib.
* * *10:41
Gəncə şəhərində yeni doğulan uşağı zibilliyə atıblar.
Dekabrın 23-də şəhərin Gülüstan qəsəbəsi ərazisində məişət tullantıları üçün qoyulmuş qutuların yanında yeni doğulmuş, naməlum oğlan uşağı tapılıb. Körpə 2 saylı Birləşmiş Uşaq xəstəxanasına yerləşdirilib.
Səhiyyə Nazirliyindən verilən məlumata görə, uşağı vətəndaşlar taparaq xəstəxanaya təhvil veriblər: “Körpənin səhhətində nəzərəçarpacaq ciddi problemlər görünmür. Müayinələri davam etdirilir. Hazırda həkim nəzarətindədir”.
Hazırda faktla bağlı araşdırma aparılır. (qafqazinfo)
